Shillong, Naitung 13:
U nongïalam ka Voice of the People Party (VPP), Bah Ardent M Basaïawmoit u la ong ba lada ka VPP ka ai jingmut ïa ka Sorkar te kan don jingmut aïu pat ban tyrwa thaw ïa ka ‘Expert Committee’.
Haba kylli halor ka jingkren ka Myntri ka tnat Aiñ ka Kong Ampareen Lyngdoh ba ki seng saiñ pyrthei kim shym la ai jingmut sha ka committee ne ka sorkar jylla lait noh tang ka KHNAM, u Bah Ardent u la pynshai “Ba ka pyrthei ka tip shai ïa ka nongrim kaba ka VPP ka ïeng bad ngi la ïakren bad u Myntri Rangbah ba balei kane ka mat ka mih shi mih.”
“Phi khmih lynti aïu na ngi, haba ngi la dep ong ban thung ïa ka Expert Committee, kaei ka kam jong ka Expert Committee lada ma ngi, ngi la ai noh ïa ki jingai jingmut. Ka Expert Committee ka dei ban trei ïa la ka bynta ban pynbeit thymmai ïa ka Reservation Policy bad u Myntri Rangbah un sa pynshai halor kane ka bynta”.
“Kam don jingmut ban kren ïa kajuh shi kajuh, ba ka VPP kam pat ai jingmut bad kam donkam ruh ban ai jingmut, hynrei kaba kongsan ka dei ba kane ka Expert Committee kan sdang ban pyntyllun ïa ki kam kumno ban khmih bniah ban pynbeit thymmai ïa ka Reservation Policy bad ngin sa peit ïa ka kaiphod jong ka Committee, la ngi dang donkam ne em ba ngin kren ne ngi la hun ïa ka jingpynbeit jong ka Expert Committee,” la ong u Bah Ardent.
