Shillong, Naitung 14:
Ka United Democratic Party (UDP) kaba donlang ha ka Sorkar MDA-II, ka la phah ïa ki jingai jingmut halor ka jingpynbeit ïa ka Reservation Policy (RP) bad kita ki mat ai jingmut ki don 8 tylli ha kaba ki nongïalam kane ka seng saiñ pyrthei ki la kam ba kine ki mat ki dei ki bym noh shiliang shano-shano, bad kiba pdiang lang da baroh.
Ka UDP ka la leit rah ïa kine ki jingai jingmut sha ka Myntri Sorkar, ka Kong Ampareen Lyngdoh kaba dei ka shongknor jong ka Committee halor ka Roster bad Reservation Policy. Kane ka jingphah ka UDP ïa ki mat ai jingmut ka la wan tang shisngi hadien ba ka VPP ka la pynpaw ba kam treh ban ai jingmut ei ei namar kan ieh beit ha ka Expert Committee kumno ban leh bad ban khmih bniah.
Haba kren sha ki lad pathai khubor hadien ba la dep ïakynduh ïa ka Kong Ampareen, u General Secretary ka UDP, u Bah Jemino Mawthoh u la ong ba ka Reservation Policy ka dei ka mat kaba la kren da kiba bun ki kynhun ban khmih bniah bad ka UDP ruh ka la bsuh ha ka kular ilekshon (manifesto) jong ka.
U la ong ba ka jingphah ïa ki mat ai jingmut ka dei kumba la rai ha ka jingïalang jong baroh ki seng saiñ pyrthei kaba la long ha u Jymmang mynta u snem, ha kaba la mynjur lang ban phah ïa ki jingai jingmut sha ka Committee kaba khlieh da ka Kong Ampareen. Kane ka Committee pat kan sa phah sha ka Expert Committee ïa ki jingai jingmut kiba la phah da ki seng saiñ pyrthei.
U Bah Jemino u la ong ba ka UDP ha shwa ba kan phah ïa ki mat ai jingmut sha ka Committee kaba khlieh da ka Kong Ampareen, ka la ïathir ïatai sani shwa bad ka la don ka jingïakynduh ym duna ïa ka 14 sien ha ryngkat ka jingtwad jingmut lang na ki riewshemphang bad na ki riewsaid aiñ.
U la ong ba ka UDP ka shim ba ki jaitbynriew trai muluk ha Meghalaya ki la donlang bad imlang la katta phew snem bad ki la ïadonlang ha ka por ba ïakhih ban ïoh Jylla. Kum ki para jaitbynriew dei ban burom markylliang bad kam mut satia ba haba khmih bniah ïa ka Reservation Policy, kata kan ktah ïano-ïano hynrei ka dei ban wanrah jingbha ïa ki para jaitbynriew trai muluk jong ka Jylla.
“Ka Chairperson jong ka Committee halor ka Roster bad Reservation Policy ka la kmen ïa ki jingai jingmut ka UDP, bad ka la ïathuh ba dei tang ka UDP kaba la phah ïa ki jingai jingmut halor kane ka mat,” la ong u Bah Jemino.
Halor ka jingong ka VPP ba ym donkam satia ban ai jingmut halor ka jingdawa pynkylla ïa ka Reservation Policy, une u nongïalam ka UDP u la ong, “Ngi kum ka seng kaba la kren ïa kane ka mat bad buh ruh ha ka mat kular ilekshon, ngi sngewdei ban phah ïa ki jingai jingmut sha ka Committee kaba khlieh da ka Kong Ampareen, kumba la rai ha ka jingïalang jong baroh ki seng saiñ pyrthei. Lada ngim ai kita ki jingmut halor kane, kaei pat ngin ïakren ban pynkylla ïa ka RP?”
Haba kylli la ka UDP ka shim ïa ka jingbun briew kum kawei na ki mat ai jingmut ban pynshong nongrim haba pynbeit thymmai ïa ka Reservation Policy, u Bah Jemino u la ong ba ki don kiwei ruh ki kyndon (criteria) kiba dei ban pyndonkam lang haba pynbeit ïa ka Reservation Policy bad ki don ruh ki bynta kum ka jinglong sahdien bad jingduna ka ïoh ka kot hapdeng ki jaitbynriew trai muluk kiba donkam ban pynshong nongrim lang nalor ka jingbun briew.
U Bah Jemino u la ai nuksa ruh ba ha India baroh kawei, ka bhah lane reservation na ka bynta ki nongshong shnong kiba dei ki OBC ka long 27 percent, hynrei lada kheiñ na ka jingdon briew ha India, ki nongshong shnong kiba dei ki OBC ruh ki don kumba 40 percent bad ki la bun bha.
Kumta u la ong ba ka nongrim ban pynkylla ïa ka Reservation Policy ka don bun ki bynta, ym tang kawei ne ar tylli, hynrei ki jingkdew ki la don lang ha kine ki 8 tylli ki mat ai jingmut kiba la phah.
Hynrei u la ong ba ïa kine ki 8 tylli ki mat ai jingmut ym pat lah ban batai namar ka Committee kaba khlieh da ka Kong Ampareen ka dang hap ban phah shwa sha ka Expert Committee.
Halor ki briew kiba dei ban don ha ka Expert Committee, u Bah Jemino u la ong ba kita ki riewshemphang ki lah ban dei kiba tip bha ïa ka riti synshar nalor kiwei pat kiba tip bha ïa ka jinglong jingman ka rukom ai bhah. Hynrei ngi donkam ruh ban pynrung ïa ki riewshemphang kiba na kane ka Jylla jong ngi ruh namar ki don ki khraw pyrkhat ruh kiba dei na ki jaitbynriew trai muluk jong kane ka Jylla.
