Shillong, Jymmang 04
Namar ka jingpyrshah ki nongtrei jong ki skul bad kolej ‘Deficit’ ïa ka skhim ‘Provident Fund’ ba la pynbna thymmai, ka Sorkar Jylla ka la khot ïa ki nongïalam jong ki seng kiba don ka jingsngewkhia sha ka miej ïakren ban “sngewthuh kham bha ïa ki jingeh jong ki bad ban wad ïa ki lad ki lynti kiba lah ban pynbeit.”
“Ka Sorkar Jylla ka kular skhem ban pynbeit ïa ki jingsngewkhia jong baroh ki nongshim bynta ha ka rukom kaba tei. Ha kaba ïadei bad kane, ka tnad pule-puthi ka la khot ïa ki nongïalam jong ki seng ba don ka jingsngewkhia sha ka jingïakren ban sngewthuh kham bha ïa ki jingeh jong ki bad ban wad ïa ki lad ki lynti kiba lah ban pynbeit,” ong ka kyrwoh na u Commissioner & Secretary ka tnad pule-puthi, u Vijay Mantri ha ka Lah Sngi U Blei.
“Ïa ka jingïalang la pynbeit ban long ha ka 6 tarik Jymmang ha ka por 3:00 baje mynsngi ha Main Conference Hall, Secretariat,” la bynrap biang.
Kane ka sienjam ka long hadien ba ki nonghikai ‘Deficit’ ki la pynlong ïa ka jingïakhih ‘Poster Campaign’ ha baroh kawei ka Jylla ban kyntait ïa ka ‘Meghalaya Non-Government School and College Employees Centralized Provident Fund Scheme, 2026’, da kaba kdew ïa ka kum ka “CPF thok” bad dawa ban pynphai biang sha ka ‘Draft’ jong u snem 2023.
Haba pynleit jingmut bad shimkhia ïa ki jingpyrshah, ka tnad ka la ong, “Ha kajuh ka por, la pynpaw ïa ki jingsngewkhia da ki katto-katne ki bynta jong ki nongtrei, khamtam eh hapdeng ki shlem pule ‘Deficit’.”
Ka tnad ka la kdew ba kane ka kam mynta ka don hakhmat ka Ïingbishar.
“Kane ka kam mynta ka long ‘Sub Judice’ hakhmat ka Ïingbishar Meghalaya High Court, bad ka Sorkar ka la dep buh ruh ïa katei ka skhim ba la pynbna hakhmat ka Ïingbishar bad ka dang ap ïa ka rai jong ka,” ong ka kyrwoh.
Haba ïada ïa kane ka skhim, ka tnad ka la ong ba la pynbna ïa ka “da ka jingthmu ban pyntikna ïa ka jingshngaiñ kaba ïaineh ha ka liang ka pisa-tyngka bad ka jingïada ha ka imlang-sahlang na ka bynta palat 30,000 ngut ki nongtrei jong ki skul bad ki kolej bym dei Sorkar ha kylleng ka Jylla.”
“Ka skhim ka pyni ïa ka jingkylla kaba kongsan bad kaba ïaid shaphrang ha ka liang ka pule-puthi, naba ka kner ïa ka ‘Provident Fund’ kaba beit ryntih bad ki jingmyntoi baibam sha ki nongtrei kiba bun, kynthup ïa ki nonghikai ‘Deficit’ bad ki ‘Lecturer’, ki nonghikai ‘Adhoc’, SSA bad RMSA, ki nonghikai Hindi bad Science ‘Grant’, ki nonghikai ‘Pre-Primary’ kumjuh ïa ki nongtrei ki bym hikai (non-teaching) ha ki thup kyrdan bapher-bapher,” la ong ka kyrwoh.
“Da kaba wanrah lang ïa baroh kine ki thup kyrdan hapoh ka rukom treikam kaba ïatylli bad kaba pynïaid da ki briew ba la pyntbit, ka skhim ka thmu ban kyntiew ïa ka jingïaryngkat, ka jinglong shai bad ka jinglong ba ïaineh,” la bynrap ka tnad.
Ka la ong shuh-shuh ba ka jubab ka long kaba ai jingkyrmen haduh mynta.
“Ka long kaba sngewtynnad ba bun bah ki nongtrei ki la pynpaw ïa ki jingpynsngew kiba manbha ïa kane ka skhim, bad ka kam ban plie ïa ki ‘Permanent Retirement Account Number’ (PRAN) ka la dep sdang ha ki katto-katne ki bynta jong ka Jylla,” ong ka kyrwoh.
Haba ban biang ïa ka nongrim jong ka, ka tnad ka la ong, “Ka Sorkar ka pynpaw biang ïa ka jingkular jong ka ban ïada ïa ka jingmyntoi bad ka bha ka miat jong baroh ki nonghikai bad ki nongtrei, bad ban pyntikna ba ka jingpyntreikam ïa ka skhim kan long ha ka rukom kaba hok, kaba shai bad kaba kynthup lang ïa baroh.”
