Shillong, Naitung 14:
Ki pulit jong ka Lumdiengjri Police Station ki la khot hajir ïa u Working President ka Hynñiewtrep National Youth Movement (HNYM), Bah Donlang Nongbri mynta ka sngi ka 14 tarik Naitung, 2023 halor ka jingbyrngem jong u ban thaw seng lehnoh lada ka sorkar kam ai jingïarap ïa ki paidbah ha khappud.
Ïa kine ki kyntien u Bah Donlang u la kren ha ka jingïalang ha Motphran ha ka 23 tarik Naiwieng, 2022 hadien ka jingshah siat ki Khasi ha Mukroh, West Jaiñtia Hills ha 22 tarik Naiwieng, 2023.
Ha kane ka sngi ba shah khot hajir la synranlang ïa u Bah Donlang da u Bah Louis Dohtdong kum President lem bad ki dkhot.
Haba ïakren bad u Bah Donlang u la ïathuh kane ka jingshah khot hajir ha ki pulit ban ai jubab ka dei ha ka por ba u ai jingkren ha Motphran ha ka 23 tarik Naiwieng, 2023 uba la byrngem ban thaw da ka seng lehnoh lada ka sorkar jylla kam lah ban ai jingïada ïa ki paidbah ha khappud.
“Nga la wan ban batai sha u heh pulit ha Lumdiengjri Police Station ba kane ka jingbyrngem kam dei ba kan urlong shisha, hynrei namar ka jingsngewbitar naba ki paradoh parasnam haduh san ngut ki la shah siat ha ki pulit Assam ha shnong Mukroh, West Jaiñtia Hills” u la ong.
U la ong ba kane ka jingkren ka dei tang ban shu byrngem, hynrei kin nym poi sha kata ka kam ban seng lehnoh namar ki kwah ba kin pynbor ïa ka sorkar ba kan ïada ïa ki paidbah ha khappud.
Nalor kane, u la ïathuh ba ha kane ka jingleit jubab sha ki pulit, na ka liang ki pulit ka Lumdiengjri Police Station kin hap ban ïakren bad u Superintendent of Police ka East Khasi Hills halor kane ka bynta.
Na ka liang u Bah Louis Dohtdong kum u President u la pynpaw ka jingsngewlyngngoh ba ka jingkren jong u Working President ha u bnai Naiwieng 2022 ki pulit ki dang khot hajir mynta, hynrei ïa kata um lah ban ong eiei namar ka dei ka kamram jong ki pulit.
U la ong ki pulit Assam bad Karbi ki wan jynrat haduh 21 tylli ki tynrai dieng ha Lapangap. Shaei ki pulit Meghalaya ki lah ban ïada? Hynrei ki bun kam ban khot hajir ïa ki sengbhalang.
U la ong ka jingkren u nongïalam ka HNYM ka dei namar ka jingshah ñion palat ki paradoh parasnam ha khappud.
