Shillong, Naitung:
Kum ka dak ka jingïamynjur lang ban pyrshah ïa ka jingthmu jong ka sorkar pdeng ban pyntreikam ïa ka Uniform Civil Code (UCC) hapoh ka jylla, ki lai tylli ki District Council kiba kynthup ïa ka Khasi Hills Autonomous District Council (KHADC), ka Jaiñtia Hills Autonomous District Council (JHADC) bad ka Garo Hills Autonomous District Council (GHADC) ha ka sngi Balang ki la shong jingïalang ban pyrshah ïa kane ka jingthmu jong ka sorkar pdeng ban pyntreikam ïa ka UCC ha ka jingïalang ba la pynlong hapoh ka shlem treikam jong ka KHADC.
Ha katei ka jingïalang la wan ban ïashimbynta da u Chairman jong ka High Power Committee ka GHADC, u RK Sangma, u CEM ka JHADC, u Bah Thombor Shiwat, ki MDC, ki Executive Member (EM) ka KHADC.
Haba kren sha ki lad pathai khubor hadien ba la wai ka jingïalang, u Chief Executive Member (CEM) ka KHADC, u Bah Pynïaid Sing Syiem u la ong ba ha katei ka jingïalang ki la don shibun tylli ki jingïakren hapdeng kitei ki lai tylli ki District Council ha kaba ïadei bad ka jinthmu ban pyntreikam ïa ka UCC hapoh ka jylla.
U Bah Pynïaid u la ïathuh ba ha katei ka jingïalang ki la shim ïa artylli ki rai kiba kynthup halor ka jingpyrshah ïa ka jingthmu ban pyntreikam ïa ka UCC hapoh ka jylla. Kaba ar ka long ba ki la shim ban phah da ka Joint Resolution ha kaba yn sa ïasoi lang da baroh lai tylli ki Council bad nangta yn sa phah pat sha ka National Law Commission hashwa ka 14 tarik u Naitung 2023 ha kaba ïadei bad ki nongrim kiba kitei ki lai tylli ki District Council ki la pyrshah halor ka jingthmu ban pyntreikam ïa ka UCC hapoh ka jylla bad ïa katei kajuh ka jingthoh yn sa phah ruh sha ka sorkar jylla.
“Lashai ka sngi ka 13 tarik u Naitung, ngin ïoh ban phah noh ïa kane ka ‘resolution’ ka jong ngi ba ngin pyrshah ha kaba ïadei bad ka jingpyntreikam ïa ka UCC hapoh Meghalaya sha ka National Law Commission”, la ong u Bah Pynïaid.
U Bah Pynïaid u la ong ba kum ki Council ki sngew ba ka jingpyntreikam ïa ka UCC hapoh ka jylla kan sa pynjah noh ïa ka jingriewspah ka kolshor, ka riti ka dustur bad ka jinglong jingman ka jaitbynriew.
“Ki kyndon kiba la ai hapoh ka Sixth Schedule ban ïada bad ai jingshngaiñ ïa ka jingriewspah ka kolshor bad ka riti ka dustur kan ktah bha bad kan don jingktah ruh ïa ka jingïoh pateng, ka ïathoh ïatar, ka jaka ka puta, ka khlaw ka btap bad kiwei kiwei, ngi sngew ba kadei ka dei ka rynsan kaba biang tam ba ngin wan lang hajuh kum ki laitylli ki District Council ban pyrshah kum ka jylla baroh kawei”, la ong u Bah Pynïaid.
Na ka liang u CEM ka JHADC, u Bah Thombor Shiwat u la ong ba baroh lai tylli ki District Council ki la wanrah ïa la ki jong ki nongrim ba ki la pyrshah bad u la ong ba lada kum ki District Council kim wan shakhmat ban pyni ïa ka jingpyrshah ka jong ki, ka lah ban jia kaei kaei.
Na ka liang u Chairman jong ka High Power Committee (HPC), u RK Sangma, u la ong ba hapoh Rilum Garo ruh ki la don shibun tylli ki jingïalang kiba la ïashong ha kaba ïadei bad ka jingïakren ban pyrshah ïa ka UCC bad ki kynhun, ki nongkitam, ki sengbhalang bad kiwei kiwei ka Rilum Garo.
