Shillong, Naitung 14:
Lai ngut ki samla kiba dei na kane ka nongbah ki la shah kem lem bad hynñiew ngut kiwei pat ha ki pulit ka jylla Goa ha kine ki khyndiat sngi halor ka jingdonkti ban pynïaid ïa kawei ka ‘Call Centre’ kaba la thok la shukor ïa ki nongshong shnong ka United States da kaba leh mynleh kum ki nongtrei jong ki ‘Bank’ kiba don ha US bad da kaba kular ban ai ram (Loan) ïa ki.
Katkum ka khubor na ki pulit ka Goa, la ong ba kitei ki khyndai ngut ki la donkti ban shukor ïa ki nongshong shnong da kaba leh mynleh kum ki nongtrei jong ki ‘Bank’ bad da kaba tyrwa ban ai ram bad ha kajuh ka por, ki la pan pisa na kita ki nongshong shnong ha ka dur jong ka kuna.
Na ka liang ki pulit ki la leit khynra ïa ka shlem ba don kata ka ‘Call Centre’ ha Majorda, South Goa bad ki la kem ïa kitei ki khyndiat ngut katba ki dang treikam. Ha ka por ba la leit kem ïa ki, ki pulit ki la ong ba kita ki briew ki dang ïakren bad ki katto katne ki nongshong shnong ka US da ka jingthmu ban shukor ïa ki.
La ong ba kitei ki khyndai ngut ki la leh mynleh kum ki nongtrei ki ‘Bank’ kiba don ha US da kaba pyndonkam da ka X-lite App. Nalorkata, ki la pyndonkam ïa ki ‘Laptop’ bad ‘Virtual Private Network’ (VPN) ban ïakren bad ki briew kiba ki thmu ban shukor ha US.
Ki lai ngut kiba na Shillong kiba la shah kem ki long u Akash Biswa, 26 snem ka rta, u Ajay Biswa, 25 snem ka rta, bad u Akash Sunar, 23 snem ka rta.
Kiwei pat ki long u Vinay Makwana, 32, na Ahmedabad ha Gujarat; Ghachi Alfarz, 28, na Mehsana, Gujarat; Kesang Tamang, 20, na Jalpaiguri ha West Bengal; Rahul Sarsar, 29, na Matunga ha Mumbai; u Tanmoy Dasgupta, 20, na Dimapur ha Nagaland bad u Rehan Shaikh, 27, na Mumbai.
