Shillong, Naitung 14:
Kum ka dak ka jingsngewkhia halor ka jingïakynad ha Manipur kaba la neh mynta la palat 2 bnai, ka North Eastern Hill University Teachers’ Association (NEHUTA) ha ka Sngi Thohdieng ka la pynlong ïa ka jingïaid paidbah ba jai-jai ban wanrah biang ïa ka suk ka saiñ ha katei ka Jylla.
Ha katei ka jingïaid paidbah kaba la long ha phyllaw ka North Eastern Hill University (NEHU) la ïashim bynta da ki spah ngut ki samla pule, nonghikai bad nongtrei jong kane ka skulbah.
“Ngi da sngewkhia shi kat dei haba ïadei bad ka jingjia ha Manipur ha kaba bun bah ki nongshong shnong ki la kylla phetwir bad ym shym la don kino-kino lad jingïarap kiba biang kiba la leh haduh mynta,” la ong u dkhot ka NEHUTA, u Prof. Prasenjit Biswa haba kren bad ki nongthoh khubor hadien ka jingïaid paidbah.
Haba kdew ba ka ‘Relief Committee’ kam kynthup lang ïa baroh, u la ong ba ka kynhun ka kwah ïa baroh ki jaidbynriew ban don lang hapoh ka ‘Relief Committee’, ha kajuh ka por dei ban pynbiang ïa ki lad jingïarap kum ka bam ka dih, ki dawai-dashin (ha kum kane ka por) khamtam sha ki kyndong-kynshrot jong ka Manipur.
“Ka dei ka khim-khait kaba khraw na bynta ka longbriew-manbriew. Haba phai sha ka mat politik haba ïadei bad kane ka bynta, ïa kine dei ban pynbeit ha ka miej ïakren bad ka Sorkar India ka dei ban thung ïa u ksiang uba lah ban wanrah ïa ki kynhun ba don hapdeng ka jingïakynad sha ka miej ïakren bad ban pynbeit kumjuh ban shim ïa ka rai ha la ki jong ki jong ki kylla khnang ba kum kine ki jingjia kin ym jia shuh nangne shakhmat,” la ong u Biswa.
Na ka liang u President barim ka NEHUTA, Prof. Xavier P. Mao u la ong ba ka kamram ba ka Sorkar ka dei ban leh noh mardor ka long ban khmih ïa kito ki nongshong shnong kiba la kylla phetwir bad kyntu ruh ba ki bor kiba treikam na rieh ki dei ban sangeh noh shi syndon ban pynshit bad ai ding ïa ki imlang-sahlang.
Ha kajuh ka por, u la ban jur ba dei ban pynduna noh ïa ka jinghuri-hura lyngba ka jingpynbeit bad jingïateh naba kane ka dei ka jingangngnud, ka thong bad ïa kane dei ban pynbeit khlem kano-kano ka jingnoh shiliang.
“Ka Sorkar ka dei ban pyntikna ha ka ban pynsangeh ïa ki hamsaïa bad kiwei-kiwei ki jingtip ba bakla,” u la ong.
Ha kawei ka liang, u la pynsngew ba ki bor ïada ki dei ban long ki bym shah liang bad ban pyndep hok la ka kamram khnang ban tehlakam ïa baroh ar jaidbynriew kiba don hapdeng ka jingïakynad bad ba ka shong suk song shngaiñ kan wan phai biang.
“Lym kumta kin nang bun ki bor ïada bad ki kynhun kieng atiar bapher-bapher ruh kin ïadon bynta bad kane kan nang wanrah shuh ka jyrwit-jyrwat. Ka dei ban don ka jingbym shah liang ha ki bor ïada,” la ong u Prof. Mao.
Shuh shuh u la bynrap ba ka Sorkar BJP ha ka Sorkar Pdeng kam dei ban pyrkhat namar ba don ka Sorkar BJP ha Manipur, kumta kan ym pyntreikam shuh ïa ka President’s Rule.
“Lada ka jinglong-jingman ka la long shaba palat liam ban tehlakam ïa ka, dei ban pyntreikam ïa ka President’s Rule khnang ba kan ym don ka jingshah liang,” u la ong.
