Shillong, Naitung:
Ka Seng Samla Hima Langrin (SSHL) ka la ong ba lada ka Khasi Hills Autonomous District Council (KHADC) kam lah ban jubab ïa ka jingdawa jong ka seng ban weng ïa ka jingdon jong ar tylli ki bor synshar hapoh ka Hima Langrin Syiemship, ka seng kam banse ban shim da kiwei ki lad ki sienjam ban pynjubab ïa ki.
Haba kren sha ki lad pathai khubor ha ka Sngi Palei, u President jong ka Seng Samla Hima Langrin, u Bah PS Lyngdoh u la ong ba ka jingïaleh jong ka seng ka long pyrshah ïa ka jinglong beaiñ kaba mih ar tylli ki bor synshar. Ka seng ka la phah ruh da ka shithi haduh lai sien sha ka Khasi Hills Autonomous District Council (KHADC) hynrei kaba sngewsih ka long ba lehse ka dang ïai sah tang hapoh ka jingkhmih bad kam pat poi hangno-hangno ruh bad ka jingdawa jong ka seng kam long pat long kaba seisoh.
“Ngin nym lah ban pdiang ïa ka jingmih jong ki artylli ki bor synshar bad dei halor kata ka nongrim ngi la phah da ka shithi sha ka District Council hynrei haduh mynta ngi dang ap ïa ka jubab ka jong ki na ka bynta kane ka jingdawa ka jong ngi”, la ong utei u President.
Kumta ka Seng Samla Hima Langrin ka la ong ba lehse kan sa poi ka por ba ka jingpyrshah jong kin kan nym poi shuh tang hapoh Phlangdiloiñ ne ha surok hynrei ka jingpyrshah jong ka seng kan long noh hakhmat jong ka District Council.
Nalor kata, u President u la pynshai ruh halor ka jingmih ka jingong ba ka Management Board kam dei ka Authority, u la ong ba lada ka Management Board kam dei ka Authority, kumno u Syiem jong ka Hima Langrin um mihkhmat ïa ka Hima kum u Syiem hynrei u la mihkhmat ïa ka Hima kum u Chairman jong ka Management Board.
