Shillong, Naitung 14:
Kum shi bynta ka jingpynkhreh na ka bynta ka jingïaseng Synod kaba 26 ka ban sdang naduh ka 14 tarik haduh ka 17 tarik u Lber 2024, ki nongïalam jong ka Balang Presbyterian Nongthymmai kaba hap hapoh ka Umsning Constituency ha ryngkat ka jingsynranglang jong u MLA barim, u Bah Jason Sawkmie Mawlong ha ka sngi Thohdieng ki la leit ban ïakynduh ïa u Symbud Myntri ka Jylla, u Bah Prestone Tynsong ban pynsngew hakhmat jong u ïa ki jingdonkam na ka bynta ban maramot ïa ki lynti ki syngkien, ban pynbit pynbiang ïa ka bording ilektrik khamtam eh ïa ka umbam umdih.
Haba kren sha ki lad pathai khubor hadien ka jingwan ïakynduh ïa u Symbud Myntri Rangbah ka jylla, na ka liang kitei ki nongïalam ka Balang Presbyterian Nongthymmai ki la pynpaw ïa ka jingsngewkmen kaba shikat dei eh hadien ka jingïakynduh ïa u Symbud Myntri Rangbah. Hadien kata, ki la ong ba na ka liang jong u Symbud Myntri Rangbah u la ong ba un sa phah ïa ki karikor ba kin leh ïa ka jingkheiñ jingdiah baroh bad shen yn sa pyntrei noh pat ïa ki kam khnang ba ka jingpynkhreh ïa ka Synod kan long kaba jop bad kaba iphuh-iphieng.
“Kumba ka long ka surok kam biang, ka umbam ka umdih kam biang, ka bording kam biang bad ngi wan ban pynsngew ïa kita ki jingeh ki jong ngi, ngi pynpaw ruh ïa ka jingaikhublei ïa u Symbud Myntri Rangbah jong ngi uba la shimkhia ïa kane ka kam bad uba la kular ruh ïa ka ban ïarap ïa ka balang katba lah ba ka kam kan sted na ka bynta ka jingpynkhreh jong ngi ka balang ban pdiang ïa kane ka jingïaseng Synod”, la ong kitei ki nongïalam ñiam.
Shuh shuh kitei ki nongïalam ñiam ki kyrmen skhem ruh ba kum ka balang ryngkat ka jingïatreilang bad utei u nongmihkhmat barim ka thaiñ, ba hashwa ba ka balang kan pdiang ïa katei ka jingïaseng Synod, kiei kiei baroh kin long kiba bit ba biang khnang ba kan pynsuk ïa u paid riewngeit ban poi sha katei ka jingïaseng Synod kaba 26 jong ka Ri Bhoi Presbyterian Synod ha ka Balang Presbyterian Nongthymmai, Umsning.
Na ka liang u Bah Jason Sawkmie Mawlong u la ong ba ka la don ka jingkular ba kan don ka jingkhot ïa ki karikor ba kin pyndep ban leh ïa ki jingkheiñ jingdiah bad u la kyrmen ba yn sa lah ban pyndep ïa ki kam baroh ha shwa ban long ka Synod.
