Shillong, Naitung 14:
Ki dkhot ka Hynñiewtrep Youths’ Council (HYC) ha ka Sngi Thohdieng ki la leit ban tur kyndit-kynsan sha khyrdop ka Main Secretariat ha ryngkat ki sur jingdawa bad ki jingthoh ‘placard’ ban pyntreikam noh ïa ka Inner Liner Permit (ILP), ha kajuh ka por ban pyrshah ïa ka jingthmu ka Sorkar ban wanrah lynti rel ha Ri-lum Khasi-Jaiñtia.
“Hadien ka jingkren u Myntri Rangbah ka Jylla ba ka Sorkar ka don jingthmu ban wanrah lynti rel khamtam hapoh East Jaiñtia Hills, ka seng naduh kaba sdang haduh mynta ka kynti, ka ïeng beit ha ka nongrim ba ka pyrshah ïa ka lynti rel kat bym pat don ki aiñ ki ban ïada khamtam na ka jingrung kyrthep jong ki bar jylla,” la ong u General Secretary ka HYC, Bah Roy Kupar Synrem haba kren sha ki lad pathai khubor hadien ka jingïakynduh bad u Symbud Myntri Rangbah ka Jylla, Bah Prestone Tynsong.
U la ong ruh ba ka jingthmu jong ka seng ban wan ïakhih ha katei ka jaka ka long ban phah khubor sha ka Sorkar ba lada kam pyntreikam ïa ka ILP, ne kano-kano ka aiñ ka ban ïada na ka jingrung kyrthep ki bar jylla, kata kam dei ban phohsniew ban wanrah ïa ka lynti rel hapoh ka Jylla, ha Ri-lum Khasi-Jaiñtia la ka long ha East Jaiñtia ne Ri-Bhoi – ‘No ILP, No Railway’.
“Ïa ka rel kit mar bam ne tiar ne rel kit briew, ka nongrim kaba ka seng ka ïeng ka long ba ngin ym shah da lei-lei ruh ban wan sha Ri-lum Khasi-Jaiñtia katba ka Sorkar Jylla bad Sorkar India kim pat pyntreikam ïa ki aiñ ki ban ïada ïa ngi kum ka jaidbynriew rit paid la ka long da ka ILP ne ka Amendment Bill ka MRSSA jong u snem 2020,” la ban biang u Bah Synrem.
U la ïathuh ruh ba ha ka jingïakren bad u Symbud Myntri Rangbah ka Jylla, u (Bah Tynsong) la kren da kaba shai ba kam pat don kano-kano ka jingïakren halor ka mat jong ka lynti rel wat ha ka jingïalang jong ka Kynhun Myntri.
“Ka Sorkar Jylla mynta hi kam don jingmut ban wanrah ïa ka rel ha Ri-lum Khasi-Jaiñtia…kata ka dei ka jingkren na ka liang jong u (Symbud Myntri Rangbah) ba u la pynpaw hakhmat jong ngi,” la ong utei u nongïalam.
Halor ka mat ba ïadei bad ka ILP, jingpynrung ïa ka Ktien Khasi ha ka Khyrnit ba 8 ka Riti Synshar ka Ri bad Amendment Bill jong ka MRSSA, u la ong ba u Bah Tynsong u la pyntip sha ka seng ba ka Sorkar ha ka Dorbar Synrai ka ban sa long shen ka nongbah New Delhi, ka Kynhun Myntri ka Sorkar Jylla hapoh ka jingïalam u Conrad K. Sangma kan sa leit ïakynduh ïa u Myntri Rangbahduh ka ri, u Myntri ka tnad kam pohïing ka Sorkar Pdeng, nalor kiwei-kiwei ki Myntri ban pynkynmaw bad buddien halor kitei ki mat ba dang sahteng bad ka Sorkar India.
“Ngi kwah ban ïohi ba ka Sorkar Jylla hapoh ka jingïalam u Conrad Sangma bad Bah Prestone Tynsong kin pyni ïa ki kam. Ngi khmih lynti ïa kata ka Kynhun Myntri ha kine ki sngi ban wan, ngin ïoh ïa ka jubab na ka tnad kam pohïing ka Sorkar Pdeng. Ka seng kan ïai ap ïa kane,” u la ong.
