Shillong, Naitung:
Ka Hima Langrin, South West Khasi Hills hapoh ka jingïalam u Pa’iem Nangtei Syiemïong ka la ïoh ban sam mar 4 lak tyngka sha ki 36 tylli ki Balang bapher bapher kiba don hapoh ka hima na ka jingmih ba ka hima ka ïoh lum khajna.
Haba ïakren bad ki lad pathai khubor ha Shillong Press Club mynta ka sngi, u Bah Enboklang Nonglang uwei na ki khun ki hajar jong ka hima u la ïathuh ba ka hima kam lah ban ai jingïarap man uwei-pa-uwei u nongshong shnong. Kumta ka Hima Langrin ka la ai jingïarap mar 4 lak tyngka sha ki 36 tylli ki Balang mar kajuh la ki dei kiba rit ne baheh kiba don hapoh ka hima.
Shuh shuh u la ong ba ka jingkynnoh ka Seng Samla Hima Langrin ba u Syiem u la sei marwei ban ai jingïarap pisa sha ki balang, kane ka jingkynnoh kaba bakla namar la rai lang da ki Myntri bad Lyngdoh ban ai jingïarap sha ki 36 tylli ki balang mar 4 lak tyngka, kaba la kot shi klur sawphew saw lak tyngka kaba dei jong mynta u snem 2023.
U la pynshai ruh ba ka hima ka la ai sngewbha haduh 73 lak tyngka sha kiwei pat ki Balang shabar ka Hima Langrin.
U Bah Enboklang u la pynshai ïa ka jingkynnoh ka Seng Samla Hima Langrin hapoh ka jingïalam u Bah PS Lyngdoh namar ba u Syiem la pynkylla jaka shimet ïa ka Hima Langrin, hynrei kam don kum kata. Hynrei ka don ar tylli ki jaka shimet kiba ïaknieh hapdeng ka Hima bad ka ïing ka sem jong u Bah Nangtei Syiem kaba la neh palat 30 snem.
U la ïathuh hadien ba ka hima bad ka ïing ka sem jong u Bah Nangtei Syiem ki la ïasuk ki la rai lang ban thaw da ka Management Board ban peit ïa ki ar tylli ki jaka ban lum khajna khnang ban long beit kawei ka dor khnang ban nym lum tam kawei ka jaka ne ban lum duna kawei ka jaka kan long mar kajuh hynrei ïa ki kam synshar bad ki iew ki hat la peit beit da ka Hima.
U Bah Christopher Lyngdoh u la ïathuh ba ki don ki Balang kiba pyndonkam ban shna ïingmane bad don ruh kiba pyndonkam ha kiba bun ki liang.
Ha kajuh ka por u la kyntu ïa ka Seng Samla Hima Langrin hapoh jingïalam Bah PS Lyngdoh ba kin wanrah ka jingshong suk shong saiñ hapoh ka hima.
