Shillong, Naitung 14:
Ka por pynlip bording ilektrik ha ka Jylla ka la hiar mynta sha ka 4 kynta na 8 kynta ha ki jaka sor, tangba ym pat lah ban weng shisyndon ïa ka jingpynlip bording ilektrik wat lada ka um ka la kham biang ha ki pung kiba ju pynmih bording ha kine ki sngi namar ka jingbteng ban hap slap.
Katkum ki bor pynïaid ka MeECL, la ïathuh ba ïa mynta, la pynhiar ïa ka por pynlip bording ilektrik da kaba peit thuh ïa ka jinglong jingman ka jingpynmih bording khamtam hadien ba la nang kiew ka um ha ki pung kiba ju pynmih bording.
Ha nongbah Shillong ka por pynlip bording ilektrik ka la hiar sha ka 4 kynta kata, ka jingpynlip bording kan long naduh 1 baje shiteng synñia haduh 5 baje mynstep.
Ha Tura ruh ka por pynlip bording ka la hiar sha ka 4 kynta na ka 8 kynta, bad ha Jowai ka la hiar sha ka 5 kynta, katba ha thaiñ nongkyndong la pynhiar na ka 10 kynta sha ka 7 kynta.
“Ynda la khmih bniah ïa ka jinglong jingman ka rukom pynmih bording, yn sa shim ïa ka sienjam ban pynduna shuh shuh ïa ka jingpynlip bording ilektrik,” la ong ka tyllong khubor.
Ka MeECL kam pat lah ban weng shisyndon ïa ka jingpynlip bording ilektrik namar ba dang donkam ban pynphai noh shwa sha kiwei pat kiba la nang ai ïa ka bording ïa ka Jylla ban pyndonkam baroh shi katta ban lait na ka jingpynlip bording kham bun kynta.
