Shillong, Naitung 14:
Ka Khasi Jaiñtia Christian Leaders Forum (KJCLF) ha ka Sngi Thohdieng ka la phah jubab sha ka Law Commission ba 22 ka India haba ïadei bad ka Uniform Civil Code (UCC).
“Ka jingthmu ba bha ban pynïaryngkat lang ha ka kyrdan, jinglong kumjuh ha ki lad ki kabu bad jingïada jong ka aiñ lem bad ka jingïadei kaba ïajan hapdeng ki nongshong shnong jong kane ka ri ka dei ban long ka thong jong ka UCC kumba la pynpaw da ki nongïalam jong ka ri kaba laitluid, kaba riewspah kyrhai ha ki jinglong kyrpang jong ki jaidbynriew bapher-bapher, riti-dustur bad jingngeit niam hapoh ka jingkdup jong kane ka ri kaba ïar ba la tip kum ka India,” la ong Secretary ka KJCLF, Rev. Dr. Edwin H. Kharkongor ha ka jubab ba la phah sha ka Law Commission ba 22 ka India.
Haba ïashim bynta lang ha ka jingïamir jingmut bad jingïakren halor ka UCC kumba la pynpaw da ka Sorkar ba mynta bad ka Law Commission ba 22 ka India, ka KJCLF ka la pynsngew ba baroh ki jaidbynriew, jingngeit niam bad riti-dustur ki don la ki jong ki bynta ba la pdiang bad ba la bud haba phai sha ka shongkha-shongman, jingïapyllait san shyieng, jingpynbit pynbiang ha ka liang ki jaka-puta, jingïoh pateng bad kumta ter-ter katba kiwei pat ki jaidbynriew ki don la ki jong ki jingïapher na kawei pat ha ka liang ka riti-dustur.
“Kumta yn ym lah ban pyntreikam jubor ïa kawei ka UCC nalor kine ki jingriewspah kiba la pdiang bad bud naduh ki por mynshuwa ha kylleng ka ri,” la ong u Secretary.
Haba ïadei bad ki jaidbynriew Khasi jong ka Meghalaya, u la ong ba kan buh jingma ïa ki Khasi, ka jinghiar pateng bad riti-dustur naba ka jingpyntreikam ïa ka UCC kan ïalam sha ka jingrat dyngkhong ka bym lah pdiang ïa ka jingshim jait na ka kmie kaba long kyrpang ïa ka jaidbynriew Khasi.
“Ka ri mynta ka donkam eh ïa ki prokram ban tei ïa ka imlang-sahlang bad ki jingïadei ba ïajan ha ki kyrdan bapher-bapher bad hapdeng ki para nongshong shnong bapher-bapher jong ka. Ka ri mynta ka donkam palat ban pyntreikam ïa ki prokram ki ban weng ïa ki jingeh ha ka liang ka ïoh ka kot bad ka imlang-sahlang bad ban kyntiew ïa ka suk ka saiñ bad ka hok,” la ong ka jubab na ka KJCLF.
Shuh shuh la bynrap ba kan long kaba biang eh ïa mynta ban ïaid shakhmat bad kaei kaba ka Law Commission ba 21 ka India ha shuwa ka la kren shai ba ka UCC “kam long kaba donkam ne kaba biang ha kane ka por”.
Kumta ban ïaid shakhmat bad ka ajenda na bynta ka UCC pyrshah ïa ka jingkwah jong uba bun bah u nongshong shnong hapoh ka ri kan pyni ïa ka jinglong sarong bad jingleh klet ïa ki jingkitkhlieh jong kane ka Sorkar.
