Tura, Naitung 14:
Ka ACHIK, kaba pynlong ïa ka jingshah thngan kaba khlem pud kat haduh mynta, ha ka Sngi Thohdieng ka la kyntu ïa u Myntri Rangbah, Conrad K Sangma, ba un pynbna noh ïa ka Tura kum ka nongbah jong ka Meghalaya ha ka por tlang.
Katei ka kynhun ka la ong ba da ka jingpynlong ïa ka Tura kum ka nongbah ha ka por tlang, kan ïarap ban kyntiew ïa ka roi ka par ha baroh ki liang ha ka jylla baroh kawei bad kan ym long kaba noh shiliang.
Ha u kyrwoh khubor, ka ACHIK ka la ong ba ka jingbuh sa ïa kawei ka nongbah kan ïarap ban pynsting ïa ka nongbah Shillong bad ha kajuh ka por kan wanrah ïa ka roi ka kiew sa sha kiwei pat ki bynta jong ka jylla.
“Ka Tura, kaba dei ka sor kaba heh tam ha Rilum Garo, ka wan shakhmat ban ïoh long kum ka nongbah ka jylla ha ka por tlang. Ka Tura ka long ruh kum ka khyrdop ban poi sha ki jaka ba kyndong bad namarkata, kan ïarap ban ïoh ïa ki kam pynroi,” la ong ka ACHIK.
Shuh shuh ka la ong ba lada pynlong ïa ka Tura kum ka nongbah kaba ar, ka Shillong kan kham ïoh lad ban kylluid khamtam ha ka por tlang namar ka jingwan jong ki paidbah na shabar ka jur bha.
“Da kaba pynkynriah ïa ka jingtreikam jong ka sorkar ha kum katei ka por sha Tura, yn lah ban kham pynkylluid ïa ka Shillong na ka jingbun briew, bad kane kan ïarap ban kyntiew bad pynneh pynsah ïa ka jingitynnad jong baroh ar ki jaka,” la ong ka ACHIK.
Ha kajuh ka por, ka la ong ba ka jingbuh ïa ka nongbah kaba ar ha Tura kan ïarap ban pynbha ïa ka synshar ka khadar ka bishar.
Ka la pynkynmaw ba ha ka por ba la ïoh ïa ka jylla lajong, ka jingïakut bad ka rai ka long ba ïa ka Tura yn pynlong kum ka nongbah jong ka Meghalaya ha ka por tlang.
