Shillong, Naitung:
U Myntri Rangbah ka jylla, Conrad K Sangma u la ïoh ban pynkup burom ïa ki samla pule kiba wan shakhmat ha ka eksam ba la pynlong da ka Meghalaya Board of School Education (MBoSE) kaba la long ha ka 13 tarik mynta u bnai ha Shillong International Centre for Performing Arts and Culture kaba don ha Mawkasiang. Ha kane ka sngi la ïadonlang u Myntri ka pule puthi, u Rakkham A Sangma, Kong Ampareen Lyngdoh ka Myntri ka tnad ka koit ka khiah, Bah HM Shangpliang kum u nongaibuit ka tnat pule puthi, Bah Wailad Shylla MLA ka Jowai constituency bad Kong Santa Mary Shylla MLA na Sutnga constituency bad palat hajar ngut ki samla pule kiba wan na ki skul bapher bapher.
Haba ai jingkren kum u kongsan u Conrad u la ong ba dei ban wanrah noh ïa ka jingkylla ha ka jingmut jingpyrkhat khnang ban wanrah ïa ka jingkylla ïa ka synshar khadar bad ïa ka jylla baroh kawei.
U la ong haba u la peit ïa ka pule puthi hapoh ka jylla ka don shibun ki jingeh kumta ka sorkar jylla kan sa thaw ïa ka Education Commission ka ban peit bniah khnang ban pynbha ïa ka jingpule.
Kum u khliehduh ka jylla u la pynpaw ba ha kine ki san snem ka sorkar jong u ka la mang pisa ban shna ïa ki skul kiba la jot rathai bad pynbha ruh ïa kiba la jot kum shi bynta ban pynbha ïa ka pule puthi.
Katba u Rakkam u la pynpaw ka jingsngewkmen ba samla pule ki la ïoh ïa kane ka bok ban pynkup burom haba ki la leh bha ha ka eksam ka jong ki mynta u snem 2023. U la ai khublei kyrpang ruh ïa ki samla kiba wan shakhmat duh ha ka eksam SSLC bad HSSLC ba kin dang trei shitom nangne shakhmat.
U la pyntip ba ka tnad pule mynta u snem ka buh ïa ka thong kaba hakhmat ban wanrah ïa ka education policy khnang ban wanrah ïa ka jylla kaba shakhmat hapoh ka ri Indïa ha ka pule puthi.
