Shillong, Naitung 14:
U Bah Commander Shangpliang uba dei President ka Hill Farmers Union (HFU) u la shah khot sngewbha ha ka ri Switzerland ban leit ïashim bynta halor kumno ban ïatai halor ka jingkylla ka suiñbneng.
Kum ban shu pynkynmaw u Bah Commander u la mihkhmat kum u President ki nongshna phlim ka Meghalaya Film Maker Association (MeFLIMA) sha ka Cannes Film Festival kaba la long ha ri France ha kine ki bnai ba la dep.
Haba ïakren bad u Bah Commander u la ïathuh ba ha ka 10 tarik mynta u bnai u la leit leh ïa ka visa ha Kolkata bad u la hap ban leit noh sha Switzerland naduh ka 17 tarik mynta u bnai ka ban kut haduh 22 tarik jong ujuh u bnai.
U la ïathuh ba ïa ka jinglut jingsep yn bei tyngka hi da ka ri Switzerland namar kane ka ri ka khot ïa u ban mihkhmat ïa ki nongrep na Meghalaya ban sngewthuh kumno ban ïada halor ka jingkylla ka suiñbneng.
“Nga la dep ïoh ban mihkhmat ïa ki nongshna phlim ïa ka jylla ha Cannes Festival bad mynta ngan ïoh ban leit mihkhmat ïa ki nongrep ha Switzerland kaba ngan sa ïoh ban batai ïa ka jingïoh lum jingtip jong nga sha ki nongrep” u la ong.
U la ong kane ka jingïasyllok ka long halor ka jingkylla ka suiñbneng ha ka pyrthei, namar mynta u snem ha ka jylla u slap u khlem hap ha u bnai Rymphang, u khlem hap ha u bnai lyiur kaba dei ka por thung ki nongrep kaba la pynlong ïa ka sorkar ban pynlip bording namar ka jingtyrkhong ka damsite.
Kumta kane ka jingïalang ban ïakren halor ka jingkylla ka suiñbneng ka long shisha kaba donkam ïa ka ri India bad ïa ka pyrthei baroh kawei.
U la ïathuh ba ïa kane kajuh ka jingïalang ha kine ki snem ba la dep, u Myntri rRangbah ka jylla, Conrad K Sangma u la shah khot bad mynta un leit mihkhmat sa ma u ïa ka jylla sha Switzerland.
