Nongpoh, Naitung 14:
Ka jingjur jong u slap mynta ka step ka la wanrah ïa ka jingshlei um kaba jur ha ki bynta jong ka surok bah National Highway 6 ha ki bynta jong ka thaiñ Jorabat. Kane ka jingshlei um ha katei u surok bah ka la wanrah ruh ïa ka jingdheng kali kaba shyrkhei, khamtam kito kiba mut kiew sha ka nongbah Shillong bad ruh kiba thmu ban hiar sha ki bynta jong ka sorbah Guwahati.
Ha kane ka jingshlei um, la ïohi ba ki don ki kali rit kiba pynsangeh ha katei ka jaka, kiba la ngam mar shiteng. Kane ka la pynlong ïa kiwei pat ki kali kiba thmu ban jam shakhmat ba kim nud shuh, hynrei ban ap ynda la kham duna ka um.
