Shillong, Naitung 14:
U Myntri ka tnat pule puthi, u Rakkam A Sangma, ha ka Sngi Thohdieng u la pynbna ïa ki kyrteng jong ki riewshemphang ki ban don ha ka State Education Commission (SEC) bad ïa kane yn khlieh da ka Prof. Sherwin May Sungoh jong ka Department of Education, North Eastern Hill University (NEHU).
Nalor ka Prof. Sherwin, u Rakkam u la ong ba u Chairman barim ka Union Public Service Commission (UPSC), u Prof. David R. Syiemlieh, u ophisar IFS ba la shongthait bad Executive Chairman barim ka MBoSE, u Tony TC Marak, kin long kum ki nongai buit ïa ka Commission, katba u Secretary ka tnat pule puthi, u Ambrose Ch. Marak un long kum u Member-Secretary ka Commission.
U Myntri u la ong ruh ba ha katei ka Commission, yn thung sa 12 ngut ki dkhot. Katei ka Commission kan treikam na ka bynta ar snem naduh ka sngi ba la pynmih ïa ka byrta.
U Rakkam u la ïathuh ba ka kamram jong ka Commission kan long ban ai jingmut ïa ka sorkar jylla halor ki mat ki jura kiba ïadei bad ki kam skul bad kolej, jingsiew tulop, jingtreikam ki skul bad kiwei kiwei.
Ha kajuh ka por, ka Commission kan ai jingmut kumno ban wanrah jingkylla khnang ban pynkiew ïa ka pule puthi ha ki skul, kolej bad kiwei pat ki shlem ai jingpule.
Napdeng kiba bun ki mat treikam kiba ka Education Commission kan peit ki long haba ïadei bad ki jingeh ki nonghikai hapoh ka Samagra Shiksha Abhiyan, ka jingbuh ryntih ïa ki skul khamtam ki skul ki bym lah ban treikam, ka jingbun palat ki skul, ka jingduna kiba pynrung kyrteng ban wan skul, ka jingdon tang hapoh 10 ngut ki khynnah ha ki skul, bad ka jingbun bad jingduna ki nonghikai ha ki skul.
