Nongstoiñ, Naitung 16:
Ka jingpynpra da kaba shu pynbthei ïa ki atoskhana jong ki karkhana beaiñ ha ka thaiñ Shallang, West Khasi Hills ka la ïai bteng haduh ka Sngi Saitjaiñ jong ka taïew. Katkum ka tyllong khubor ba la ïohlum, la ïathuh ba ka jingpynpra ïa kitei ki karkhana thang dewïong be-aiñ da ki bor pynïaid distrik jong ka West Khasi Hills ka la poi sha ka 13 tylli haduh ka Sngi Saitjaiñ.
Ha ka 14 tarik Naitung, 2023 ki bor pynïaid District ki la ïoh ban pynbthei ïa ki saw tylli ki atoskhana jong kitei ki karkhana thang dewïong be-aiñ.
Lah ban kdew hangne ba halor katei ka jingpynpra bad pynbthei ïa ki karkhana be-aiñ, u District Magistrate ka West Khasi Hills ha ka hukum ba la pynmih hapoh ka Section 144 jong ka CrPC, u la khang bad mana pyrshah ïa ka ïaid ka ïeng jong ki riewshimet lane kino kino ki kynhun ha ki jaka kiba hap hapoh ka shi kilometer na ka jaka ba don ki karkhana saiñ dewïong be-aiñ ha thaiñ Kyllonmathei bad Shallang.
Shuh shuh katei ka hukum jong u District Magistrate ka long kum shi bynta ban ïada ïa ki nongshong shnong na kino kino ki jingmynsaw ha ka por jong ka jingpynpra ïa ki karkhana be-aiñ da ki bor pynïaid distrik.
