Shillong, Naitung 16:
Ka jingjur palat ka dheng kali ki taksi kamai ha Motphran man la ka sngi ka la pynlong ïa kiba bun ki paidbah ban ïaid noh da ka kjat haba ki thmu ban leit donkam sha thaiñ Kashari, IGP bad Lachumier.
Ka Motphran ka dei ka jaka ba bun bha ki taksi kamai bad ki nongleit nongwan.
Ka jingbun ki paidbah ban kiew kali na Motphran ka dei ha ka por ba ki leit sha ki jaka trei bad ha ka por janmiet.
Hynrei ka dheng kali ha shilynter ka surok naduh Khyndai Lad shaduh Motphran ka la pynlong ïa kiba bun ki paidbah ban nym shong taksi hynrei ban ïaid noh da ka kjat.
Ka dheng kali ka dei namarba ki taksi ha Motphran ki ïeng laiñ ban thep briew bad kawei ka taksi ka shimpor ym duna ïa ka 3 minit bad lada ym don lei lei ki pulit pynïaid kali, ki lehmon bad shim kham bun ka por ban ïeng laiñ.
Ka jingbun ki taksi bad ka jingjur ka dheng kali ha Motphran ka la pynlong ruh ïa ki ar shaka ban kamai bad shimkabu ha ka rukom kheiñ bai kali. Kine ki ar shaka kim dei kiba la pynrung kyrteng bad ka tnat Transport ne siew khajna kumba long lem kiwei pat ki kali kamai.
Bun ki briew kiba la kyrkieh ban poi sha jaka trei ne leit donkam ki la hap ban shim da kine ki ar shaka ban phah leit buh bad siew da ka bai kali kaba kham rem katba oh dor ki nongñiah ar shaka.
