Tura, Naitung 16:
Uwei u nongïalam ka Garo State Movement Committee uba la ïashim bynta ha ka jingshah thngan ba khlem pud sngi ba la pynlong da ka kynhun A’chik Conscious Holistically Integrated Krima (ACHIK) ha ka Sngi U Blei u la kyllon na ka jingthait bad ka jingbym bam eiei.
Utei u nongïalam u dei u Co-Chairman ka Garo State Movement Committee, u Balkarin Ch Marak.
U Balkarin u la ïashim bynta ha ka jingshah thngan ba la pynlong da ka ACHIK hakhmat ka Mini Secretariat kaba don ha Dakopgre, Tura ban dawa na ka sorkar ban pyntreikam ïa ka ‘Backlog Policy’ ha kaba ïadei bad ka jingthung kam thung jam bad ban pynlong ïa ka Tura kum ka nongbah ka Meghalaya ha ka por tlang.
U Balkarin u la shah thngan la san sngi lynter mynta. Arngut ki nongsumar na ka Dakopgre CHC ki la wan sha ka jaka ba shong thngan ka ACHIK ha ka Sngi U Blei. Hynrei ki nongshah thngan ki la ong ba lait na kine, ki bor distrik ki khlem phah da ki doktor ba kin wan peit ïa ka jinglong jingman ka koit ka khiah jong ki. Nalorkata, ka sorkar kam pat ong eiei halor kitei ki jingdawa ka ACHIK.
U ophisar MCS barim, u Laben Ch Marak, uba la ïalam ïa ka jingshah thngan jong ka ACHIK, u la buh jingkylli ïa ka sorkar halor ka jingleh mynthi ka jong ka bad kumjuh ruh ka jingbym leh eiei jong ki bor distrik ka West Garo Hills.
“U Balkarin u la sdang ban shah thngan shi sngi hadien jong nga. Ngi la shu ïa dih tang na ka um slap ba la buh ha ki bitor bad ka dang ïaid kumta haduh mynta. Ym pat shym la don doktor ki ban wan peit ïa ngi naduh ka sngi ba ngi la sdang ban shah thngan. Mynne, u Balkarin u la don lang bad nga bad hadien kata u la khie tlot bad mynta u don hapdeng ka jingshitom,” la ïathuh u Laben.
Shuh shuh u Laben u la ban biang ba ym shym la don wat tang uwei u doktor lane ka Ambulance na ka bynta ban peit bniah ïa ki nongshah thngan.
“Nga la ïakren lyngba ka ‘phone’ bad uwei u paralok doktor bad uta pat u la ïakren bad u DMHO. Dei hadien kata ba arngut ki nongtrei ka Dakopgre CHC kin sa wan poi ha kane ka jaka ba shong shah thngan,” la ong u Laben.
U la ong ba kitei ki arngut ki la wan da ka kali shimet bad ki la thew ïa ka Blood Pressure jong u Balkarin bad ki la kyntu ba un dih da kawei ka jingdih kaba ai bor (Energy Drink). Ki la ai jingmut ruh ba dei ban pynkit noh ïa u sha Civil Hospital, Tura.
“Imat ym don doktor ha Tura. Mano u doktor uba dei ban wan peit sha kane ka jaka ba don ki nongshah thngan? Hato u DC u la buh doktor ne em na ka bynta ban peit ïa kine kiba shah thngan? Ha Shillong, ka Myntri ka koit ka khiah ka la leit poi sha ka jaka shah thngan hadien lai sngi. Nga shu donbok ba da ka jingisynei jong U Blei, nga dang khlaiñ. Ngi shu dih beit tang da ka um suda haduh mynta,” la ïathuh u Laben.
Ha kawei pat ka liang, ki nongshah thngan ki la khang lad ïa kitei ki nongsumar ban kit ïa u Marak sha Hospital namar ym shym la don doktor lane ka Ambulance ha katei ka jaka. Bad haduh mynta, u Marak u dang shah sumar ha ka jaka ba shong shah thngan.
“Ki la kwah ban kit ïa u Balkarin sha Civil Hospital da ka kali shimet. Ha kaba sdang, ki la phah ban kit hi da ma ngi,” la ong u Laben.
