Shillong, Naitung 16:
Ki samla pule na Meghalaya kiba don kumba 10 ngut eiei kiba pule ha Central Agriculture University Imphal, Manipur ki la ïoh ban leit phai biang sha ki jaka pule lajong ha ka 12 tarik mynta u bnai da kaba shong da ka liengsuiñ ban shngaiñ ka leit ka wan.
Kane ka jingleit bteng biang ki samla pule na Meghalaya sha Manipur ka dei namar ka CAU ka la pyntip ba kan sdang noh ïa ka eksam ha ka taïew ban wan. Kane ka long hadien ba ka jingïakynad hapdeng ki jaidbynriew Meitei bad Kuki ka la sdang ban shongsuk shongsaiñ hadien ar bnai ba neh ha katei ka jylla.
Ym tang ki samla kiba pule ha CAU kiba la leit biang sha Manipur, hynrei ki samla kiba pule doktor bad kiwei ki liang ki la leit phai biang sha Imphal ban pyndep ïa la ka jingpule.
Na ka bynta ban shngaiñ ha ka leit ka wan, ki samla pule na Meghalaya ki la leit sha Imphal da ka liengsuiñ khnang ban nym jia eiei lada ki leit lyngba ka surok namar ha kiwei ki jaka kam pat long shngaiñ.
Haba ïakren bad kawei ka samla pule na Meghalaya ka la pyntip ba ki poi sha Imphal ha ka 12 tarik mynta u bnai da kaba leit phai da ka liengsuiñ.
Ka la ïathuh ba ka shongsuk shongsaiñ ka la sdang ban wanphai ha katei ka jylla, hynrei kam da tip bha ha ki jaka ïew jaka hat namar ki sah beit ha hostel bad leit sha klas ba ki pule namar kim pat nud ban mih than sha surok.
Katkum ka khubor ba la ïoh jingtip, ka sorkar Manipur ka la pyllait ïa ka curfew naduh ka por 5 baje mynstep haduh 5 baje janmiet khnang ba ki paidbah kin ïoh ban leit ïadie ïathied ne leit donkam.
Kum ban shu pynkynmaw, ka jingïaumsnam hapdeng ki jaidbynriew Meitei bad Kuki ha jylla Manipur ka la sdang naduh ka taïew ba nyngkong jong u Jymmang mynta u snem. Kumta ka sorkar jylla ka la hap ban shim jingkitkhlieh ban leit shaw noh ïa palat 200 ngut ki samla kiba pule ha ki liang bapher bapher ha Imphal.
