Shillong, Naitung 16:
Ban weng ïa ka jingkhapngiah bad dheng kali ha nongbah Shillong, ka por ka la dei ïa ka Sorkar ban weng lut ïa kiba pynïeng kali harud surok bad ban sdang pyntreikam ‘Odd-Even’ noh ïa ki kali kiba leit buh bad shaw skul.
Ka jingpyntreikam da ka ‘odd-even’ number ïa ki taksi kamai tang ha Khyndai Lad bad Motphran kaba la pynbeit da ki bor pynïaid district ha ka jingshisha ka la kham pynïoh kamai kylluid ïa ki taksi ha kine ki jaka paidbah. Hynrei ka jingpynjari jong ka Deputy Commissioner ka East Khasi Hills district ka la shah kheiñ dewthala noh ha kaba la hap pyndem noh ha ki nongñiah taksi kiba kham lah ban kamai hapdeng ka dheng kali kaba jur kumba ju long ban ïa kaba kham kylluid namar ki ong ba kane ka ktah ïa ka jingkamai jong ki.
Ka dei ka jingshisha ba ki kali jong ki riewshimet ki kham bun ban ïa ki kali kamai, bad ha ki jaka ba don ki jaka pule harud surokbah, ka dheng kali ruh ka jur bha, ym tang ka jingkhapngiah ha Motphran bad Khyndai Lad.
Ka jingtuid ki kali kamai shisien tuid ban leit kamai sha kine ki jaka bad ka jingmih kynsan ki kali jong ki riewshimet ha ka por leit buh skul bad ha ka por ba wai skul ban leit shaw ïa ki khun ki kti ka dei ruh ka por ba jur bha ka dheng kali ha ki katto katne ki jaka ha nongbah Shillong.
Ka jaka ha IGP, ha Barik, Dhankheti, Laitumkhrah ka dei ka jaka ba jur bha ka dheng kali namar ki kali jong ki riew shimet ki mih shisien mih ban ïeng harud surok ban leit on skul bad ha ka por ba ki wan shaw skul.
Kine ki jaka pule ki la donkam ban pynbor ïa ki kmie ki kpa jong ki khynnah ban pyndonkam da ki skul bos haba wan sha skul bad ynda la wai skul, lym kumta, ki paidbah nongleit nongwan ha nongbah Shillong ki hap ban pynlut bun ka por ha surok namar ka dheng kali kaba jur.
Ki bor pynïaid district bad ka Sorkar ki hap ban shim ka rai kaba eh khamtam ban weng noh lut ïa ka jingpynïeng kali harud surok bad ban pyrkhing ïa ki kali ki riewshimet kiba leit buh skul bad shaw skul.
Nalorkata, ki don sa ki nongtrei Sorkar ha kaba la bun sa kiba wanrah kali haba ki wan trei bad ka dheng kali ka jur bha ha ka por ba ki wan sha jaka trei bad ha ka por ba wai trei.
Kumta ka dheng kali ha Shillong ka dei na baroh ki liang ym tang ki taksi kamai hynrei ki riewshimet ruh kumjuh.
Ka jingbun sa ki ar shaka ka la nang pynkhapngiah shuh shuh ïa ki surok ha kylleng ka nongbah Shillong bad kine ki ar shaki ki dei kiba pynkheiñ bha ïa ki kyndon ñiah kali bad ki ïaid katba mon na kano kano ka liang, la ka dei na kamon ne kadiang, ki ïaid khlem salia bad buh jingma ïa ki briew kiba ïaid lynti.
Kumta ka Sorkar ka donkam ban shim ki sienjam kumno ban tehlakam ïa ki kali kumno ban wanrah ïa ka jingkylluid ha ka leit ka wan ki paidbah.
