Shillong, Naitung 16:
U Bah Metbah Lyngdoh u lah ban shah jied biang kum u President ka United Democratic Party (UDP) na ka bynta ka samoi treikam kaba lai snem ha ka ilekshon ka ban long ha u bnai ban wan.
Katkum ki khubor ba la ïoh lum, ka Nomination Committee (NC) kaba la thung da ka UDP kan sa shong pyrkhat ha kine ki sngi ban jied ïa u President bathymmai bad ïa baroh ki nongkitkam jong ka Central Executive Committee ha shwa ban tyrwa sha ka General Council ka ban long lashem bnai.
Ki khubor ki ïathuh ba haduh mynta ym pat don ban mih shakhmat na ki nongkitkam ka UDP ban pynpaw ba kwah ban long President. Dei na kane ka daw ba ka Nomination Committee ka lah ban tyrwa biang ïa ka kyrteng u Bah Metbah Lyngdoh ban long kum u President ka seng.
Haba pynthikna ïa kane, la ïoh ban ïakren bad ka Kong Pretty Pyngrope kaba dei ka President ka UDP Women Wing kaba la ïathuh ba ka samoi treikam jong u Bah Metbah Lyngdoh ka la dei ban kut noh mynshem snem, hynrei namar ba ka la wan ka ilekshon MLA ha u Rymphang, 2023 la ailad ban bteng biang.
Nalor kata, ka la ïathuh ba ka UDP ka lah ban khot noh ïa ka General Council ha u bnai ban wan ban jied thymmai ïa u President ka UDP sengkmie.
Nangta, ka la pyntip ruh ba katkum ka rukom pynïaid kam ka seng UDP, ka Nomination Committee kan sa shong jingïalang ban tyrwa ïa ka kyrteng u President bad ïa baroh ki nongkitkam bad ban pan jingmynjur sha ka General Council ka ban mihkhmat na baroh ki jylli.
Kum ban shu pynkynmaw, u Bah Metbah Lyngdoh u la shah jied kum u President ka UDP hadien ba u President barim, Dr. Donkupar Roy u la khlad noh na kane ka sla pyrthei.
Ka UDP ka dei ka seng kaba don 12 ngut ki MLA. Kane ka seng ka ïatreilang bad ka NPP ha ka jingthaw ïa ka sorkar MDA-2. Na kane ka seng ki don ar ngut ki Myntri ha ka sorkar jylla kiba kynthup ïa u Bah Paul Lyngdoh bad u Bah Kyrmen Shylla.
Kane ka ilekshon jied nongkitkam bathymmai ka UDP ka long kum shi bynta ban pynkhlaiñ ïa ka seng ban pynkhreh ïa ka ilekshon MDC bad MP Lok Sabha ha u 2024.
