Nongstoiñ, Naitung 17:
Hadien lai phew sngi ba u la jah na ka jingleit khwai ïa kaba la suba ba u la shah rong noh ha ka umsaw ryngkat ar ngut kiwei pat ha ka wah Blei ha ka thaiñ Maweit ha West Khasi Hills, ha ka 17 tarik u bnai Naitung 2023 la ong ba sa ïa ka met ïap jong u Hubert Marthong na ka shnong Maweit la lap noh da uwei na ki nongleit khwai doh na kajuh katei ka wah.
Ka tyllong khubor na ki pulit ka ïathuh ruh ba ïa ka met la pyntikna ruh da ki bahaïing ha sem ba ka dei ka jong u Hubert Marthong.
Lah ban kdew hangne ba ha ka 18 tarik u bnai Jylliew la ïoh ban tam bad lap noh ïa ka metïap ïap jong u Bah Shilingbest Langrin na kawei na ki jaka kumba 2 kilometer duna na katei jaka kaba ki jah bad kum ban shu pynkynmaw hangne ba ïa katei ka jingjia la ïoh jingtip ha ka 17 tarik u bnai Jylliew 2023 ba ki lai ngut ïa kaba la tip kyrteng kum u Bah Shilingbest Langrin, Huberth Marthong bad u Bah Kmenlang Nonglang ba ki la jah rngai na ka jingleit khwai ka jong ki ha katei ka wah ïa kaba la suba ba ki la shah rong ha ka Umsaw jong ka Wah Blei namar ba ha ka por kumba 8 baje eiei kitei ki lai ngut ki dang ïa ïeng khwai ha uwei u mawsiang ba heh bha harud jong ka wah bad ha katei ka por la wan kynsan ka umsaw.
Kumta haduh mynta napdeng kitei ki lai ngut kiba jah rngai, ïa u Bah Kmenlang Nonglang ym pat shym la lap satia.
