Shillong, Naitung:
U Chairman ka Khadi & Village Industries Commission (KVIC), jong ka tnad Micro, Small and Medium Enterprises, ka Sorkar India, u Manoj Kumar u la pynlong ïa ka jingwan jngoh ba 2 sngi ïa ka Jylla – 13 bad 14 tarik mynta u bnai ban kner ïa ka jingïalap ‘Atmanirbhar Bharat’ bad ka ‘Local to Global’ jong u Myntri Rangbahduh ka ri, u Narendra Modi sha ki jaka ba kyndong jong ki Jylla ka Thaiñ Shatei Lam Mih Ngi.
Ha katei ka jingwan jngoh jong u, u la sam 400 tylli ki synduk ngap bad ksing ngap sha 40 ngut ki nongri ngap ka Pynursla Block, East Khasi Hills District, bad Amlarem Block, West Jaiñtia Hills District.
Ha kajuh ka por, u la sam ruh ïa ki tiar shna bording sha 20 ngut ki nongïoh jingmyntoi ha Donbosco Technical School, Laitumkhrah, Shillong.
Ha ka 13 tarik, u Kumar u la ïakynduh ïa u Myntri Rangbah ka Jylla, u Conrad K. Sangma, ha Secretariat, bad ki la ïamir jingmut bin-pa-bin halor kumno ban pynïar ïa ki kam ba ïadei bad ka Khadi & Village Industries hapoh ka Jylla.
Ha kine ki 2 sngi, u Chairman ka KVIC, u la ïashim bynta ruh ha ki prokram bapher-bapher ba kynthup ka jingai jingkren ha ka prokram ai jinghikai ba la pynlong hapoh ka Prime Minister’s Employment Generation Program (PMEGP) bad Gramodyog Vikas Yojana.
Ha ka 13 tarik haba ai jingkren ha ka prokram sam tiar shna bording ha Donbosco Technical School, Shillong, u Kumar u la ong ba hapoh ka jingïalam u Myntri Rangbahduh ka ri, u Narendra Modi, ka India ka la kiew sted ha ka liang ban long ka nonglamkhmat ha ka pyrthei.
Ha kajuh ka por, ha ka prokram sam synduk ngap ha Pynursla Block, East Khasi Hills District, u la kyrpad sha ki nongri ngap ban pynmih ïa ka um-ngap kaba paka khnang ba ka jingdawa na bynta ka um-ngap na ka Jylla kan nang jur ha ka pyrthei baroh kawei, kumta da kaba ïaid sha ka jingïohi jngai jong u Myntri Rangbahduh ka ri, u Narendra Modi – ‘Local to Global’.
Ha ka 13 tarik, ha ka shnong Nongthymmai, East Khasi Hills, u Chairman u la plie ïa ka jaka bam kaba la sdang da ka pisa ba la shim kum ka ram kaba T.18 lak hapoh ka Service Sector jong ka PMEGP. Ki nongïoh jingmyntoi jong kane ka tnad ki la ïoh pdiang ïa ka ‘subsidy’ kumba T.6.3 lak da ka KVIC.
Ha ka 13 tarik ha ka jingïakynduh kaba la long ha Secretariat, u Myntri Rangbah ka Jylla, u Conrad K. Sangma bad u Chairman ka KVIC ki la ïamir jingmut halor ki skhim bapher-bapher jong ka Khadi & Village Industries Commission.
Ha katei ka jingïakynduh, ka la don ka jingïakren kaba seisoh haba ïadei bad ka jingtyrwa ban plie ïa ka ophis ba ïasnohlang (Joint Office) jong ka KVIC bad ka State Khadi Board ha Shillong, ryngkat ka jingïasnohktilang bad ka Khadi India na bynta ki tiar Khadi bad ka lad ai kam ai jam ha ka tnad kam jngoh kai pyrthei lyngba ka jingwanrah shuh-shuh ïa ki ‘Home Stay’ ha Meghalaya hapoh ka PMEGP.
Ha ka 14 tarik u Naitung, kum shi bynta jong ka ‘Honey Mission,’, u Chairman u la sam 200 tylli ki synduk ngap bad ksing nngap sha 20 ngut ki nongïoh jingmyntoi ha ka shnong Pdengkseh, Amlarem Block, West Jaintia Hills District.
Nalor kane, u la ïashim bynta ruh ha ka prokram ai jinghikai ba la pynlong hapoh ka PMEGP bad Gramodyog Vikas Yojana ha Mawlynnong, East Khasi Hills District, kum u kongsan ha kaba la ïadon lang bun ngut ki samla bad nongïoh jingmyntoi kiba la ïashim bynta.
Haba ai jingkren ha ka jingïalang, u Kumar u la ong ba u la wan sha ka Jylla ha ryngkat ka jingïoh jngai jong u Myntri Rangbahduh ka ri, u Narendra Modi, uba la kyrpad ïa ki samla ka ri ban long ki nongseng kam bad ym ki nongwad kam.
Shuh shuh u la leit jngoh ruh ïa kawei ka ‘Home Stay’ PMEGP Unit kaba la pynïeng ha Cherrapunjee hapoh jong ka PMEGP, kaba la ïoh pdiang ïa ka ram kaba T.10 lak, ryngkat ka pisa ‘Margin Subsidy’ kaba T.3.5 lak, kaba long na bynta 35% jong ka ram ba la shim. Na ka liang ki ophisar bad nongtrei ka Sorkar Jylla bad KVIC ki la ïadonlang ha baroh ki prokram.
