Shillong, Naitung:
U MDC ka BJP na Tura u Bernard N Marak u la ong ba ban pynlong ïa ka Tura kum ka nongbah jong ka Jylla ha ka por tlang ka dei kaba la kular naduh 50 snem mynshwa ha por ba ïoh ïa ka Jylla, bad kane ka mat ka la rung ruh ha ka soskular ïasuk (peace pact) kaba la ïasoi bad Sorkar Pdeng 12 snem mynshwa.
U Bernard u la pynpaw ïa kane haba kynmaw burom ïa ki nongtrei bylla na Rilum Garo kaba tip kum ka ‘Labour Corps Day’ ha kaba ki Garo ki la aiti ïa la ka jingim ha ka jingïakhun France.
Haba pynkynmaw ïa ka jingaiti ki rangbah Garo ïa la ka jingim, u Bernard u la ong ba mynta ki duna kiba kynmaw ïa kine ki rangbah hynrei kano kano ka jingïakhih bad jingaiti kaba la leh da ki riewshimet kan nym long lehnohei.
Ha kane ka sngi, u Bernard u la ban biang ba ka jingpynlong ïa ka Tura kum ka nongbah ha ka por tlang ka dei ka jingdawa kaba dei bad shisha.
U la ong ba hashwa ban soi ïa ka soskular ïasuk, ka Tura kum ka nongbah ha ka por tlang ka dei kawei na ki jingdawa kaba la rung ha ka thup jingdawa sha ka Sorkar Pdeng 12 snem mynshwa.
“Ka nongbah ha ka por tlang ka dei kaba la dep kular ïa ki paidbah Garo naduh 50 snem mynshwa ha ka por ba ïakhih ban ïoh Jylla hynrei la iehnoh shiteng da ki nongïalam barim bad la pynim bad buh biang ha ka thup jingdawa hashwa ban soi ïa ka soskular ïasuk,” la kam u Bernard.
U la kynnoh ba ka Sorkar kam shym la pynlong jingïalang man ka por ban ïakren ïa kane da kaba ai daw ïa ka por khangdam bad shibun bah ki jingdawa ban kyntiew ïa ki kam pynroi la kam ei da ka Sorkar bad ka jingpyntreikam ïa ka soskular ïasuk (kaba la soi da ka Sorkar Jylla bad ka Sorkar Pdeng bad ANVC) kam shym la ïaid katkum ka jingkhmih lynti.
U la ong ba ki surok bad ki jingtei jingshna bad shibun ki kam pynroi kiba la wan jia ki dei na ka daw ka jingsoi ïa ka soskular ïasuk hynrei ka Sorkar Jylla kam shim burom shalade katba ki nongïalam kiba donbynta ban soi ïa ka soskular ïasuk ki shah ieh kumto.
Kumta u la ong ba ka jingdawa ban wanrah ïa ka nongbah ha ka por tlang ka dei ka jingdawa kaba dei eh bad u Myntri Rangbah u dei ban shimkhia.
U la ong ba shibun kiba la aiti ïa ka jingim na ka bynta ka jingbha ka lashai jong ki khun ki kti bad ban shngaiñ ka khyndew ka shyiap, ka lariti bad dustur bad ka ktien.
Une u MDC ka BJP u la ong ruh ba ka BJP ka la buh ha ka mat kular ilekshon ban buh ïa ka mini secretariat ha Tura bad ka kwah ïa ka Sorkar ban pyntreikam ïa ki jingkular kiba la ai sha ki paidbah.
