Shillong, Naitung 17:
Arngut ki samla ki la duh noh ïa la ka jingim ha ka Lah Sngi U Blei hadien ba ki la ngam jyllop ha ka Wah Umjapung kaba dang hap ha ka shnong Mawpdang, East Khasi Hills.
Katkum ka khubor ba la ïohlum na ki pulit, la ong ba la ïoh sei ïa ka met jong kitei ki arngut mynta ka miet hi.
Na kawei pat ka tyllong khubor, la ïathuh ba kitei ki arngut ki dei shi paralok bad ki trei ki ktah ha ka shlem treikam jong ka BSNL.
Uwei na kitei kiba khlad u dei uba la tip kyrteng kum u samla Jopborlang Lyngdoh Mawphlang, 29 snem ka rta, uba shong ba sah ha ka dong Sngithiang ha Lower Mawprem, bad uwei pat u dei u samla Lewis Wahlang, 22 snem ka rta, na Nongmensong.
Ka tyllong khubor ka ïathuh ba ki la don kumba 8 ngut shi paralok kiba leit kai sha katei ka wah ha ka por mynsngi. La ong ba u samla Jopborlang u la leit jngi ha katei ka wah, hynrei hadien katto katne por, u la sdang ban ngam jyllop.
Haba ïohi ba u paralok jong u, u la ngam jyllop, u samla Lewis u la leit mareh da ka jingthmu ban pyllait ïa u. Hynrei baroh arngut ki la ngam jyllop lang.
Nyngkong, la ïoh sei shwa ïa ka met jong u samla Lewis ha ka por kumba 8:30 mynmiet bad hadien shiteng kynta, la ïoh sei sa ïa ka met jong u samla Jopborlang.
