Shillong, Naitung 17:
Ka Jylla ha ka Lah Sngi U Blei ka la kynmaw burom ïa ka lyngkhuh sngi ïap ba 188 snem jong u khlawait ka ri bad ka jaidbynriew – u Tirot Sing Syiem, Syiem ka Hima Nongkhlaw uba la ïeng ban ïakhun pyrshah ban ïada ïa ka jaidbynriew na ka jingthombor jong ka Sorkar Phareng.
“Kane ka sngi ka ïai pynkynmaw ïa ngi ïa shibun kiei-kiei kiba kum ka jaidbynriew ngim dei ban klet namar wat hadien 188 snem, hynrei ka kyrteng u Tirot Sing Syiem ka ïeng rasong. Ngi dei ban kynmaw ïa kita ki matti kiba une u Syiem bakhraw u la leh bad len lade na bynta ki daw bah jong ka jaidbynriew ha kato ka por,” ong u President ka Khasi Students’ Union (KSU), samla Lambokstarwell Marngar haba ai jingkren ha ka jingïalang kaba la long hakhmat u mot dur ba shi rynïeng jong u Tirot Sing ha Madan Ïewrynghep.
Haba pynkynmaw ïa ka jingthombor jong ka Sorkar Phareng da kaba wan rung sha Bri U Hynñiewtrep, u la ong ba ka jaidbynriew ka donbok shi kat dei ban don ïa uba kum une u Syiem uba shynrang bad uba ïeng rangbah ban ïakhun pyrshah ïa ki shipai Phareng ha ryngkat ki tup ki man jong ki.
Haba kren halor ki jingthoh bapher-bapher, u la pynsngew sha ki para ri kiba dang khie ‘rang san ba ki don ki jingthoh ha kine ki sngi kiba la sdang ban ïalam bakla ïa ka histori jong ka jaidbynriew baroh kawei.
“Ki briew ba na shabar ki la sdang ban batai bakla bad batai stad ïa kaei ka thymmei jong ka jaidbynriew baroh kawei. Ki don ruh ki jingthoh kiba ong ba u Tirot Sing u dei u nongïakhun laitluid ka ri India, hynrei nga kwah ban pynkynmaw ba u Syiem Tirot Sing u khlem ïakhun na bynta ka Ri India, u ïakhun na bynta ka Ri Khasi lane ka Ri-Hynñiewtrep baroh kawei,” ong u samla Marngar.
Haba kdew ba ka jingmih shakhmat jong ki samla ban aiti na bynta ka ri bad ka jaidbynriew ka dei ka dak jong ka jingkyrmen, u la ong ba kam mut ba dei tang ki dkhot sengbhalang ne kiwei pat ki kynhun ki ban ïaid shakhmat bad katei ka kam, hynrei lada don ka jingsngewkhia, ka dei ka por jong ka jingkhot na bynta iwei-pa-iwei ban mih shakhmat bad leh eiei.
“Ha ka mynnor, ka Sorkar India ka pynbor ïa ngi ban long ki nong India, hynrei ha ka mynta, ka jingthombor ïa ka jaidbynriew jong ngi ka dei lyngba ki aiñ ba khyllah. Kine ki dak ki shin ki buh jingma ïa ka jaidbynriew hynrei katba ki samla ki dang don ïa ka thong bad ka mynsiem ba shynrang, ka mynsiem jong ka jingkitkhlieh…ka dang don pat ka lad ka lynti ban tei ïa ka jaidbynriew ha ka hok bad ka jingshisha,” ong u President ka KSU.
Haba ïadei bad ka jingleit Delhi jong ka Kynhun Myntri ka Sorkar Jylla ban ïakren halor ka Ktien Khasi bad Inner Line Permit (ILP), u la ong, “Kata ka dei ka jingkut jingmut jong kita kiba u paidbah u la pynshong ha Secretariat ban ai ka jubab ïa ka jaidbynriew baroh kawei kiba la ap kmang ba ILP ka dei ban urlong hapoh ka Bri U Hynñiewtrep…kiba la ap kmang ba ka Ktien Khasi kan ïoh rung noh ha ka Khyrnit kaba 8 bad kiba la ap kmang ban don noh ïa u pud u sam uba pura.”
Na ka liang utei u nongïalam u la pynpaw ruh ka jingsngewkhia halor ka jinghiar ka pule-puthi hapoh ka Jylla namar ka jingbakla jong ki mat treikam ka Sorkar.
Shuh shuh u samla Marngar u la kyntu ïa ki nongthaw aiñ ban pynduna ïa ka jingpynpah siren ha ki surok-syngkien hynrei ban pynjur ïa ki kam ha Secretariat ban im ka Jylla bad ka jaidbynriew.
Ha kane ka sngi, nalor ka KSU, ka FKJGP, HNYF, HITO bad kiwei-kiwei ki la ïashim bynta ha ka ban buh syntiew hakhmat u mot dur ba shi rynïeng jong u Tirot Sing ha Madan Ïewrynghep.
