Shillong Naitung 17:
Ka Khun Hynñiewtrep National Awakening Movement (KHNAM) ka la ong ba lada ka jingdawa ban pynlong ka ka Tura kum nongbah ha ka por tlang ka dei halor ka nongrim jong ka ki kam pynroi, ka dang donkam ban pynkylla nongbah shuh shuh bun tylli ki jaka khamtam kito ki thaiñ bad ki district kiba dang sahdien ki kam pynroi la ka dei ïa ka West Khasi Hills, Jaiñtia Hills ne Ri-Bhoi District bad kiwei kiwei.
“Ka jingdawa ka ACHIK ban pynlong ïa ka Tura kum ka nongbah por tlang jong ka Jylla ka dei khlem kano kano kaba shong nongrim, la ka Rilum Garo ka jngai eh na nongbah Shillong ne ki don ki jingeh kiba khang ïa ki briew ban wan na Tura sha Shillong,” la pynpaw ka KHNAM ha u kyrwoh, lyngba u Working President, u Bah Thomas Passah.
U Bah Passah u la ong ba ha India, tang ka Himachal Pradesh ka don ar tylli ki nongbah – Shimla bad Dharamshala.
“Ka daw ba ki don ar tylli ki nongbah ha Himachal Pradesh ka dei namarba hap thah bad shah khang ki surok ha ka por tlang kaba buh jingeh ban poi sha nongbah Shimla. Hynrei ha Meghalaya, ym don daw satia kaba ïahap ban don ar tylli ki nongbah,” la ong u Bah Passah.
U Bah Passah u la ong ruh ba ka jingshisha ka long ba ka bhah ki kam pynroi ka la pynïaid sha Rilum Garo ha kine ki phew snem bad lada sdang ban lum thup ïa ka mang tyngka na ki tnat treikam bapher bapher kiba ka Sorkar ka la phah sha Rilum Garo, yn sa ïohi ba ka Tura ka dei ka bym donhok ban ïoh ïa ka kyrteng kum ka nongbah ha ka por tlang da kaba pynshong nongrim halor ki kam pynroi.
Une u nongïalam ka KHNAM u la ong ba ka nongbah Shillong ka neh tang maka kum ka nongbah naduh ka por bym pat phiah ïa ka Assam haduh ban thaw ïa ka Jylla Meghalaya ha ka 21 tarik Kyllalyngkot, 1972 ha kaba ka Shillong ka la neh kum ka nongbah.
“Namarkata, kum kine ki jingdawa kim donhok bad pynkhia ïa ka Jylla ha ka liang ka pisa tyngka namarba kin mih ki jinglut ki bym pat da donkam satia,” la ong u Bah Passah.
