Khliehriat, Naitung 17:
Ka jingïakren pynbeit pud hapdeng ka jylla Meghalaya bad Assam ha ka 15 tarik Naitung ha Umkiang ka long ka jinglyngngoh ïa kiba bun, wat tang ki lad pathai khubor jong ka jylla Meghalaya kim ïoh jingtip, la ong ka Khasi Student Union (KSU) Narpuh Circle.
Ka KSU ka la buh jingkylli, balei ka sorkar Meghalaya kam ïalam wat tang uwei u nongthoh khubor lada dei jong ka sorkar ne jong ki shimet. Katba ka sorkar Assam pat ka wanrah shibun ki nongthoh khubor wat naduh Guwahati.
Kumno kin shaniah tang ha kita ki nongthoh khubor kiba na Assam kat ka kam jingïa pynbeit pud, hato ka Assam ka mutdur kumno, ba pleng ki nongmihkhmat bad ki nongthoh khubor ka jylla Meghalaya kim ïadei jingmut ban don ka jingïatreilang, la ong shuh shuh ka KSU.
Ka jingkylli ka long, shaei jah ki nongthoh khubor ka jylla Meghalaya ha ka por jingïakren pynbeit ha Umkiang ha ka 15/07/2023. Balei tang kita ki nongthoh khubor Assam, hato kin dei ma ki bad ka Assam ba lah ban rai ïa ka khyndew ka shyiap jong ka jylla jong ngi? Kaei ka jingmut jong ka Meghalaya ba kan buhrieh ïa kane ka jingïakynduh khlem da pyntip ïaki nongthoh khubor, la ong ka KSU.
Shuh shuh la ïakren ruh halor ka wah Malidor kaba pynïakhlad ïa ka Assam bad Meghalaya, hangne la ïakren ba katei ka jaka kan dei kum ka Natural Boundary ba baroh ar jylla kin don bynta ban pynneh pynsah bad ri sumar ïa ki jingdon jingem ka mariang bad ki doh pnat namar ba ka shnong Ratachera ruh ka kwah ïa kata.
Lada peit ha ka jingpynbeit pud jong ka wat ba nongkong (Phase 1), ka wah Malidor kan hap shapoh Assam da kaba katei ka sorkar ka kular ban pynneh pynsah bad ia ka jingdon jingem ka mariang bad ki doh um, ban ym shah ruh ia ki nong Assam bad Meghalaya ban khlong maw.
