Shillong Naitung 17:
Ka Butchers Association of Meghalaya (BAM) ka la pynshai ba ym don satia ka jingkiew dor ka dohmasi hynrei ka neh kumjuh kumba ju die, bad kane ka seng ki nongotdoh ka la mana ïa ki nongpathai YouTube (youtuber) kiba pynphriang khubor lamler ba kan leh da kaba tyngeh katkum ki kyndon jong ka aiñ.
Haba pynshai sha ki paidbah ba ym don satia ka jingpynkiew dor ïa ka dohmasi, u President ka BAM, u Bah Esron Marweiñ u la ong ba ki don kiba pynphriang ha YouTube ba ka dor ka dohmasi ka dei T.800 shi kilo, hynrei kane ka dei ka hamsaïa kaba thmu ban pynhiar ïa ka ïew dohmasi khnang ba ki paidbah kin nym thied, katba ka jingshisha ka long ba ka dor ka dohmasi ka khlem kiew ne kylla bad ka neh beit kumjuh kumba ju long baroh shikatta.
“Ka jingdie doh ka dei ka dor kaba ju die man ka por, bad kam don kano kano ka jinghiar ne jingkiew dor,” la pynshai u Bah Esron uba la kyntu ïa ki paidbah ban nym ngeit kum ïa kine ki khubor thok lyngba ki youtube ki bym dei ki nongpathai khubor kiba shisha.
U la ong ba na ka liang ka Sorkar ruh ka la pynshai ba ka long kaba shngaiñ ban bam dohmasi bad ym dei ban ngeit ïa kiba pyrshang ban pynkulmar jingmut ïa ki nongbam doh.
U Bah Esron u la ïathuh ba ka dor ka dei T.500 shi kilo ka dohshyieng bad ka dohmet ka dei T.600 shi kilo kumba long baroh shikatta khlem jingkylla.
“Lada don ka jingkylla ha ka dor, ka dei kaba wan na ka seng lyngba ki lad pathai khubor kiba dei hok, ym na kino kino ki briew ne ki nongpathai youtube (youtuber) kiba mih ban pathai thok,” la ong u Bah Esron.
Kumta ka seng ki nongotdoh ka la buh ka jingmana ïa ki nongpathai kiba khlem jingtip ïa ka jingshisha hynrei kiba pyntieng kohtympan ïa ki nongbam bad kum ïa kine, na ka liang seng kan sa leh ïa kaba donkam katkum ka aiñ.
Halor ka jingdonkam masi ban shohdoh, u Bah Esron u la ïathuh ba kham mynshwa naduh ba mih ka aiñ ha Assam kaba pyrkhing ban wanrah masi, ka don ka jingduna ki masi, hynrei la lah ban pyndap ïa ka jingdonkam masi da kaba ïoh na ki nongri masi kiba na kane ka Jylla.
U la ong ba kham mynshwa ba dang biang ka ïew, ka jingdonkam masi ka long kumba 3000 tylli shi taïew, hynrei mynta ka jingdonkam ka long 1500 tylli bad hapoh 2000 tylli shi taïew.
