Nongstoiñ, Naitung 17:
Kawei ka ïing kaba don ha ka dong Nondeiñ jong ka shnong New Nongstoiñ, West Khasi Hills kala shah pied bad shah prong tuh ha ki runar ki bym pat shym la ithuh satia la ki dei kiei, ha kaba ki la ïoh ban rong tuh kumba ar lak ka pisa bad saw tylli ki jingdeng ksiar.
U Bah Fullness Mawlieh uba dei u trai ïing, u la ïathuh ba ïa katei ka jingjia la lap ha ka step sngi Nyngkong ha ka por kumba 9 baje eiei da ki nongtrei ïing ki jong u bad la suba jur ba katei ka jingjia ka la dep jia naduh ka miet jong ka 15 lane 16 tarik mynta u bnai.
U Bah Mawlieh u la ïathuh ba ki runar ki la ïoh ban rong tuh saw jur ki jingdeng ksiar ba shong dor haduh kumba lai lak tyngka bad ka pisa ba kumba 2 lak duna.
Shuh shuh u la ong ruh ba sa artylli kiwei pat ki jingdeng ksiar la lap napoh khrum jingthiah bad kine ki la hap na jingthiah hadien ba ki runar ki la khyllie ïa ka jingsiang thiah bad ïa ki tiar ki tar.
Halor katei ka jingjia, la ïathuh ruh ba ki trai jong katei ka ïing ki la leit ruh ban ujor sha ki pulit ka thanad Nongstoiñ bad na ka liang ki pulit ruh mar mar ki la leit sha katei ka jaka ban pynlong ïa ka jingtohkit bad ki pulit ki dang wad bniah ruh ban pynthikna katno baroh ka pisa bad ka ksiar baroh ba la shah tuh.
Shuh shuh ka khubor ka ïathuh ba na ka liang ki pulit ki dang pynlong ka jingtohkit ban lapdien ïa ki runar kiba la donkti ban leh ïa katei ka kam.
