Shillong Naitung 17:
Ka jingpynlip bording ilektrik ha ki jaka sor kan long sa tang 2 kynta katba ha kiwei pat ki jaka kan long sa 5 kynta.
Ïa kane la pyntip ha ka lah sngi U Blei da u Managing Director ka Meghalaya Energy Corporation Ltd (MeECL) u Sanjay Goyal.
Kane ka jingpynduna ïa ka por pynlip bording ilektrik ka dei hadien ba la kham kiew shuh shuh ka um ha pung Umïam kawei na ki projek pynmih bording ilektrik ha kane ka Jylla.
La ong ba da kane, ka jingpynlip bording ilektrik ha nongbah Shillong, bad kiwei ki jaka sor kum ha Tura bad Jowai kan don sa tang 2 kynta katba ha kiwei ki jaka, ka jingpynlip bording ilektrik kan long sa 5 kynta, kaba treikam naduh ka 18 tarik.
Shuh shuh la ïathuh ba ha ki taïew ba la leit, ka MeECL ka la pyrshang ban pynduna ïa ka por pynlip bording ilektrik bad la pynlip sa 5 kynta naduh ka 12.07.2023 bad hiar sha ka 4 kynta naduh ka 15.07.2023 ha ki jaka sor.
U Goyal u la ong ruh ba la nang weng suki suki ïa ka jingpynlip bording ilektrik da kaba buh jingmut ruh ïa ka jingkiew ka um ha pung Umïam bad pynneh ruh ïa ka jingdon ka um na ka bynta ka tlang ka ban wan bad ka layout ka ban wan.
U la ong ba ka Jylla kumba ka long mynta, ka dang pynphai ïa ka bording kumba 450 million unit kaba la pyndonkam da ka Jylla ha kane ka tlang kaba la dep bad ha ka aïom ba tyrkhong um.
Kumta u la ong ba ka MeECL ka pyntreikam ïa ka por pynlip bording ha kata ka rukom ban pynduna katba lah ïa ka jingmad jingeh ki paidbah.
