Shillong, Naitung 17:
Haduh 15 ngut ki briew kiba shah kynnoh ba ki leh ïa kam awria ki la shah kem noh ha ki pulit jong ka East Khasi Hills bad ïa kine la pynngat hapoh ki kyndon jong ka Immoral Trafficking Prevention Act.
U Superintendent of Police ka East Khasi Hills, u Bah Sylvester Nong-tnger, ha ka Lah Sngi U Blei u la ïathuh ba ka la don ka jingïaid pahara jong ki pulit ha ki thaiñ Khyndailad ban leh pyrshah ïa ki nongdie met kiba ha kaba bun ki khep kam long tang ba ki die met sha ki briew, hynrei ki wanrah ruh ïa kiba bun ki jingkulmar bad huri hura.
Shuh shuh u Bah Nongtnger u la pyntip ba ki la pynlong ruh ïa ka jingkhynra kyiad bad pynjur ïa ka jingïaid pahara ha kylleng ka nongbah Shillong na ka bynta ka jingshngaiñ ki paidbah bad ban tehlakam ïa kino kino ki huri hura.
Ha kane ka jingkhynra, ki pulit kila ïoh ban kurup ïa palat 1,12,097 ML ka kyiad phareng lane Indian Made Foreign Liquor (IMFL) bad 7,74,000 ML ka kyiad pyrsi.
Ïa kane ka jingkhynra la pynlong ha ka thaiñ Motphran, Paltan Bazar, Mawblei, Nongrim Hills, ïew Laitumkhrah, ïew Mawlong, Urkaliar, Upper Shillong, Polo, Mawbah, Jhalupara bad Upper Mawprem da ka jingïarap lang ki pulit Commando kynthei ba la tip kum ki Meghashakti.
Ha kajuh ka por, ki pulit kila bat haduh 277 tylli ki kali bad ïoh daiñ kuna haduh T.2,36,500 na ka jingpynkheiñ ïa ki kyndon ïaid kali ha ka jingtalasi kali bad miet bad step da ka Shillong Traffic Police ha kylleng ki jaka.
Kine ki briew ba ngat ha ka kuna ki dei kiba ñiah kali ha ka jingbuaid kyiad, ñiah thuk-thuk khlem helmet, pynkylla ïa ki ‘silencer’, tah ïit ïong bad kiwei.
