Shillong, Naitung 17:
U ksiang ka Hynñiewtrep National Liberation Council (HNLC), Bah Sadon K. Blah ha ka Lah sngi U Blei u la ong ba ka seng shen kan sa shong biang ïa ka jingïalang haba ïadei bad ka jingïakren ïasuk namar ki kam ki ïaid beit ha ka lynti kaba dei.
“Kan sa don biang ka jingïakren. Ki kam ki ïaid beit ha ka lynti kaba dei bad kam don kano-kano ka bym i-long…baroh ka manbha. Ngi la shong ïa bun ki jingïalang, kumba 6-7 tylli ki jingïalang,” ong u Bah Blah haba kren sha ki lad pathai khubor.
U la ïathuh ruh ba ha kitei ki jingïakren kiba la urlong, kam shym la don kano-kano ka jingbym ïahap lait noh ki jingwit hangne-hangtai.
“Ngin peit kumno ban pynbeit ïa ki, iwei hadien iwei khnang ba ynda ka jingïakren ïasuk ka la ïaid shakhmat, yn ym don jingphai dien shuh,” u la ong.
U la pyntikna ba shen kan sa don ka jingïakren ïasuk watla u ksiang ka Sorkar Pdeng uba don bynta ha kane ka kam – A.K. Mishra u kham bunkam.
“Wat hapdeng ka jingbunkam jong u, u la pyllait por ban wan, bad lyngba ka lad kaba biang kaba ngin ïoh, shen ngin sa shong ïa ka jingïalang,” ong u Bah Blah.
Haba kylli la ka jingïakren ïasuk kan kut mynta u snem, u la ong, “Nga tharai…ym ka kam baroh kawei, hynrei ki bynta kiba kham kongsan jong ka jingïakren ïasuk.”
Shuh shuh haba jubab halor ka jingmap ïa ki mukotduma jong dkhot ka HNLC, u ksiang u la ong ba na ka liang ki 2 Sorkar ki dang khmih bniah ïa kane ka bynta watla um lah ban pynshai eiei ki jingsahteng.
