Jowai, Naitung 17:
U Symbud Myntri ka Jylla u Bah Sniawbhalang Dhar ryngkat u Myntri ka sorkar Jylla u Bah Kyrmen Shylla uba dei ruh u MLA ka thaiñ, ki sahep sorkar bad ki hajar ngut ki paid ka Niamtre kila wan sakhi ïa ka sngi pynkut ïa ka lehniam Behdeiñkhlam kaba heh tam ka rilum Jaintia ba la pynlong da ka Seinraij Tuber ha Tuber Kmai Shnong, East Jaintia Hills District ha ka lah sngi U Blei.
Ha kane ka sngi, ki 30 tylli ki shnong kiba kynthup 19 shnong na East Jaintia bad 11 shnong na West Jaintia Hills District kila wanrah haduh 65 tylli ki rong ki rup kiba shna itynnad ha Aitnar ryngkat ka khubor sha u paidbah kynthup naduh ban pynduh jait u khñiang HIV, ban ïakhun pyrshah ïa u drok, ka jingpynneh pynsah ïa ka mariang, ka jingpyrshah lynti rel, ka jingbym ïoh kam ïohjam, ka jingthombor ïaki kynthei kynnah nalor kiwei kiwei ki khubor sha ki paidbah bad shaka sorkar.
U Bah Sniawbhalang Dhar ha ka jingkren u la ai khublei Behdeiñkhlam ïa baroh ki khun ka Seinraij Tuber.
U la ong kum u nongmihkhmat um poi pyrkhat ban ïohi ïa ki khubor ba la wanrah lyngba ki rong ki rup kiba ai ka jingsngeng jingkraw ïa ki paidbah bad ka imlang sahlang.
Ha kaba ïadei bad ka dorkhas kaba la aiti da u President ka Seinraij Tuber u Bah Harwis Phawa ha u Symbud Myntri halor ka jingdonkam ban pynbha pynmiat ïa ki sawdong sawkun ka Aitnar, ban pynïoh surok sha Khlooblai bad ban mang jingïarap man u snem sha ka Seinraij Tuber, na ka liang u Symbud Myntri u la ong ba na ka liang ka sorkar kan pyrshang katba lah ban theh ki jingïarap.
Ha shwa ban bret, ïa ki rong ki rup ka la don ka jingïatan ne boh ‘Bhang’ kaba long kum ka jingïalehkai hapdeng ki arkynhun, ka phangneiñ bad ka phangwah bad la don ruh ka jingïaslait ne ka jingïalympat ha kaba la jop da ka phangneiñ bad katkum ka jingngeit niam ha une u snem u khaw u kba un bha sha ka phangneiñ.
