Shillong, Naitung 17:
U Bah Sanbor Shullai uba dei u MLA ka seng Bharatiya Janata Party (BJP) u la phah da ka shithi sha u Chairman jong ka Law Commission of India, u Justice Ritu Raj Awasthi ban dawa ba ym dei ban pyntreikam ïa ka Uniform Civil Code(UCC) ha ki Scheduled Area hapoh ka jylla lane ki jaka ha Meghalaya kiba don hapoh ka jingpeit bad jingsynshar ka Khyrnit Ba Hynriew (Sixth Schedule) jong ka Riti Synshar.
Katkum katei ka shithi ba u la phah, u Bah Sanbor u la ong ba kum u nongmihkhmat ka BJP napoh ka jylla Meghalaya na ka por sha ka por u la ju kren halor ki mat kiba ktah ïa ki nongshong shnong jong ka jylla bad u la ong ba ka UCC ka dei ka mat kaba hap ban pyrkhat bad kum ka aiñ kaba pyntreikam da ka Ri ka dei ban ai jingshngaiñ ïa ki rit paid bad ban ai jingïada ïa ki riti ki dustur jong ki rit paid kiba don ha ki jylla ka shatei lam mihngi ka ri.
U la ong ba ki jinglong ba kyrpang kaba ki jaitbynriew Ri lum Khasi, Jaiñtia bad Garo jong ka jylla ki don ki dei kiei kiei kiba pynlong ïa ka jingsynshar dalade ym da ka bor synshar kaba wan nabar kaba la don hapoh ka riti synshar ka ri.
U Bah Sanbor u la ong ba lada ka Sorkar Pdeng kan pyntreikam ïa ka UCC hapoh ka jylla, kan ktah ïa ki ñiam ki rukom, ki riti ki dustur bad ki jingngeit kiba la bud naduh hyndai hynthai kaba la pynlong ïa ki rit paid ka rilum ba kin long ki jaitbynriew kiba kyrpang jong ka jylla Meghalaya bad kiba kham pher na kiwei pat hapoh ka ri bad napdeng ki rit paid jong ka thaiñ, ki Khasi, Jaiñtia bad ki Garo jong ka jylla ki don ïa ka jinglong ba kyrpang kiba khmih bad pynïaid ïa la ki jong ki rukom ngeit bad ki aiñ ka riti ki dustur kiba hap hapoh ka Sixth Schedule jong ka Riti Synshar ka ri.
U Bah Sanbor u la ong ba ka Law Commission ka la pan ïa ki jingpynsngew na ki kynhun bapher bapher ha kaba ïadei bad ka jingpyntreikam ïa ka UCC bad kiba bun ki la pyrshah ïa kane ka jingthmu ban pyntreikam ïa ka bad namar ba hap ban peit katkum ka jingpynsngew jong ki paidbah, kiba bun ki paid riewlum ka jylla Meghalaya ki don ka jingtieng ïoh ba kane ka aiñ jong ka Sorkar Pdeng ka long pyrshah ïa ki aiñ ka riti ka dustur bad ki jingngeit kiba la bat naduh hyndai.
Shuh shuh u Bah Sanbor u la ong ba lada pyntreikam ïa ka UCC hapoh ka jylla Meghalaya kan don ka jingktah ïa ka jinglong ba kyrpang jong ki kyndon ai jait kmie ha ka imlang ka sahlang hapoh ka Meghalaya bad u la ong ba sorkar pdeng ka long jynsur ha kaba ïadei bad ka jingthmu pyntreikam ïa ka CAA ha kaba kiba bun ki jaka riewlum jong ki jylla shatei lam mihngi ka ri ki la lait na kane ka jingpyntreikam ia ka CAA, kumta u Bah Sanbor u la ong ba ïa kane ka rukom leh la dei ban pyntreikam ban pynneh pynsah ïa ki riti ki dustur jong ka aiñ ai jait kmie jong ki paid riewlum ka jylla Meghalaya.
Kumta ban pynneh pynsah ïa ka jinglong kyrpang, ka riti ka dustur bad ka jingriewspah ka kolshor kaba la ïada da ka riti synshar ka ri, u Bah Sanbor u la kyrpad ba ka jingthmu ban pyntreikam ïa ka UCC ka dei ban ym pyntreikam ha ki Scheduled Area jong ka jylla Meghalaya.
