Shillong, Naitung 17:
U President ka Hynñiewtrep National Youth Front (HNYF), Bah Sadon K. Blah u la ong ba ka jingdawa ban pynlong ïa ka Tura kum ka nongbah ha ka por tlang ka dei kaei-kaei ka bym lah pdiang namar ka Meghalaya ka dei ka Jylla kaba rit.
“Haba ïadei bad ka jingdawa ban pynlong ïa ka Tura kum ka nongbah ha ka por Tlang, nga sngew ba ym lah pdiang ïa kane namar ka Meghalaya ka dei ka Jylla kaba rit,” ong u Bah Blah haba kren sha ki lad pathai khubor ha ka Lah Sngi U Blei.
U la ong ruh ba ïa baroh kawei ka Indian Union la pynïaid na Delhi khlem ka jingpynkynriah ïa kano-kano ka nongbah.
“Kumta ka jingdawa na bynta ban ïoh la ka jong ka shnat treikam Sorkar, na kawei ka distrik sha kawei pat kam dei kaei-kaei, hynrei ka jingthmu ban wanrah ka jingbym sngewthuh jingmut bad ka jingbym shaniah hapdeng ki trai-ri trai-muluk ka Jylla,” u la ong
Ha kawei ka liang, haba kren halor ka jingdawa ban pyntreikam na shadien ïa ka ‘Roster System’, utei u nongïalam u la pynkynmaw ba hadien ka rai na ka ïingbshar halor ka jingpyntreikam ïa ka ‘Roster System’, kawei ka seng saiñ pyrthei ka la ïaid shakhmat bad ka jingïakhih ban dawa khmih bniah ïa ka bhah thung kam thung jam.
“Kumta ki ACHIK kiba dei ki nongshong shnong ka India ki don hok ban pyni ïa ki jingkam jong ki, la ka dei ka jingpyntreikam na shadien ïa ka ‘Roster System’ ne kiwei-kiwei,” u la ong.
Shuh shuh u la bynrap ba um don eiei ban ong halor katei ka bynta, hynrei kum ki nongshong shnong ka India ki don hok ban pynsngew.
Kumban shu kdew hangne, ka Achik Conscious Holistically Integrated Krima (ACHIK) ha ka Sngi Saitjaiñ ka la pynlong da ka prokram ïasoi paidbah ha Ri-lum Garo halor ka jingdawa na bynta ka nongbah ha ka por tlang ïa ka sor Tura.
Ka seng dang shen ka la sdang ïa ka jingïakhih shah thngan ha Tura halor ka jingdawa ban pyntreikam na shadien ïa ka ‘Roster System’, kumjuh ka jingdawa ban pynlong ïa ka Tura, ka nongbah ha ka por tlang jong ka Jylla.
