Tura, Naitung 17:
Ka Achik Holistically Integrated Krima (ACHIK) ka la nang ïoh jingkyrshan shuh-shuh halor ka jingdawa jong ka hadien ba kiba bun ki kynhun seng bad nongshong shnong ka Ri-lum Garo ha ka Lah Sngi U Blei ki la wan ban ïashim bynta lang ha ka jingïa-khih shah thngan kaba la long hakhmat ka ïingmala ka SMELC ha Tura.
Ka ACHIK ka la dawa ban pyntreikam na shadien ïa ka ‘Roster System’ ha kajuh ka por ban pynlong ïa ka Tura kum ka nongbah ha ka por tlang jong ka Jylla kaba la ïohi jngai naduh ka por ïakhih ban ïoh Jylla lajong, palat 50 snem mynshuwa.
Ka ACHIK bad ka Garoland State Movement Committee (GSMC) ha ryngkat ka United Garo People’s Forum (UGPF) ki la sdang ïa ka jingaïakhih shah thngan naduh ka 11 tarik Naitung – la wan ïasoh sa ka AAYF, NIKSAMSO, ASWA, TGCSU kumjuh ki ‘riew rangbah lyngba ka New Tura Development Forum (NTDF).
Sa kawei ka bynta jong katei ka jingïakhih ka long ba ka BJP Mahila Morcha ka la wan ban ïashim bynta lang ha katei ka rynsan naduh hynnin ka sngi.
“Kane kam dei ka mat politik hynrei ka don jingïadei bad ka jaidbyniew. Ka jingpynlong ïa ka Tura kum ka nongbah ha ka por tlang kam dei tang ka jingdawa hynrei ka kular jong ki longshuwa-manshuwa kaba la shu ieh noh kumto. Donkam ban pynbeit ïa kane ka jingbakla bad kumta ngi la wan ban ai jingkyrshan ïa ki hymmen ki para jong ngi. Ngi la shah pynduh noh la bun pateng mynta bad donkam ban pynbeit ïa kane da kaba phai na shadien,” ong ka President ka Morcha, ka Rakkhi Sangma.
U MDC barim ka Garo National Council (GNC), u Augustine Marak, uba la don lang ha kane ka sngi u la ong ba u la wan ban kyrshan ïa ka jingdawa na bynta ban pynlong ïa ka Tura kum ka nongbah ha ka por Tlang namar ka long kaba shong nongrim bad ka khana kaba jrong. Halor ka bhah thung kam thung jam, u la ong ba ka Sorkar ka long kaba biang eh ban sngewthuh ïa ki jingsngew bad ban khmih bniah ïa kane.
Ha kane ka sngi la wan ïashim bynta lang da u MDC ka BJP na Tura, Bernard Marak, uba hashuwa, u la pynpaw ïa ka jingkyrshan jong u ïa katei ka jingïakhih.
“Ki ïakhun ïa ka jingdawa kaba shong nongrim bad nga ïeng ha syndah bad ki. Ngi kyrpad ïa ka Sorkar ban wan shakhmat bad ïakren bad ki khnang ban poi sha ka jingïabeit,” ong u Bernard.
Ka General Secretary ka ACHIK, ka Bernita Marak ka la ong ba kim pyrshah ïano-ïano hynrei ki kwah ïa kaei kaba ki la ap khmih lynti.
“Ngi kwah ban pyntreikam na shadien ïa ka ‘Roster System’ naba ngi la shah pynduh noh ha kine ki 50 snem ba la dep. Lada ki nongïalam kiba dei ban pyntreikam ki la leh la ka kamram, ngin ym shong hangne ban ïakhun na bynta kane ka daw. Haba phai sha ka nongbah ha ka por tlang, ki mynbarim jong ngi ki la ïohi ïa ka Tura kum ka nongbah bad ngi kwah ba kane kan urlong,” ong ka Bernita.
Ha kajuh ka por ka la buh jingkylli halor ka jingbym don briew na ka liang ki bor distrik kumjuh na ka Sorkar naba ym shym la don ba wan kren ïa ki ha kine ki 7 sngi ba la dep wat hapdeng ka jingïakhih shah thngan.
Na ka liang u Deputy Commissioner ka WGH, u Jagdish Chelani u la wan mih ha katei ka jaka ban kyrpad pynsangeh noh ïa ka jingïakhih.
U DC u la ong ba u mihkhmat ïa ka Sorkar bad kyrpad ban pynkut noh ïa ka jingïakhih, hynrei wat hapdeng ki jingkular, ki nongïakhih kim shym la khih bad kular ban bteng ïa ka jingïakhih katba kim pat ïoh ka jingkular na u Myntri Rangbah halor katei ka bynta.
Haba kylli, u Chelani u la ong ba la buh ïa ki majistor ha katei ka jaka man la ka sngi.
