Shillong, Naitung:
U Symbud Myntri Rangbah ka Jylla, Bah Prestone Tynsong ha ka Sngi Palei u la pyntip ba ka sorkar ka la lum ïa ka jingïalang bad ki CEM jong lai tylli ki Autonomous District Councils (ADC) halor ka jingai jingmut jong ka 15th Finance Commission na ka bynta ka jingpyntreikam ïa ki skhim bapher bapher jong ka Sorkar Kmie hapoh ka Jylla.
“Ngi la ïoh pdiang ïa ki kyndon treikam na ka Ministry jong ka Panchayati Raj ba ki lai tylli ki district council ki donkam ban don noh ïa la ki jong ki portal ne ki khyrdop rit, naba khlem kane yn nym lah ban pyllait ïa ka pisa,” la ong u Bah Prestone.
U la ong ba ki district council kin hap ban pynbit pynbiang ïa ki kor ki bor lajong ha kaba ïadei bad ki projek bad ki skhim kiba la dep ban pyntrei bad kito kiba dang don ha ka jingpyntrei.
Shuh shuh u Bah Prestone u la ong ba ki dkhot na ka Ministry jong ka Panchayati Raj, bad ki ‘riewshemphang na ka tnat Community and Rural Development (C&RD) kin pynlut shisngi ha ki shlem treikam jong ki ADC ban ïarap ïa ki bad ka rukom pynbit pynbiang ïa ki portal.
“Kine ki ‘riewshemphang kin sa leit ban ïuhkjat sha ki ADC ha kane ka taïew ban wan ban ïarap ïa ki ha kaba ïadei bad ka portal kaba dei beit ban don kumba la bthah da ka Sorkar Kmie,” u la ong.
