Shillong, Naitung 18:
Ki 26 tylli ki seng kiba don ha ka liang pyrshah ha ka Sngi Ba-ar ki la pynbna ïa ka jingthaw ïa ka kynhun synrop ka bathymmai ïa kaba yn tip kum ka I.N.D.I.A lane “Indian National Developmental Inclusive Alliance” ban ïakhun pyrshah ïa ka kynhun synrop National Democratic Alliance (NDA) ba la ïalam da ka BJP.
Ïa ka rai ban thaw ïa ka I.N.D.I.A la shim ha ka jingïalang jong kitei ki 26 tylli ki seng ha nongbah Bengaluru, Karnataka.
“Ma ngi ki nongïalam jong ki 26 tylli ki seng saiñpyrthei ngi pynpaw ïa ka jinglong kloi ban ïada ïa ka saiñpyrkhat jong ka India kumba la thoh ha ka Riti Synshar jong ka Ri. Ka jinglong jong ka Ri ka la shah ktah jur na ka daw jong ka jingsynshar ka BJP. Ngi don ha ka khyllipmat bakongsan ha ka history jong ka Ri. Ki païa baskhem jong ka Riti Synshar – jingsynshar paidbah, jingsynshar bym ïaid da ka niam, jingdon bor halor ka khaïi pateng, jingai ïa ka jingsynshar ka ban wanrah ïa ka jingsam marbiang ïa ka spah ka phew jong ka Ri, jingïohlad bad jingmyntoi bad ka jingsynshar kaba burom ïa ki jylla – ki la shah ktah jur ha kine ki snem,” la ong ka jingthoh ba la pynmih da kitei ki seng.
Kitei ki seng ki la ong ruh ba ki sngewkhia shikatdei halor ka jinglong jingman kaba la pynjot thiaw ïa ka Manipur bad halor ka jingsngap jar jong u Myntri Rangbahduh ha kaba ïadei bad ki jingjia ha katei ka jylla. Ka long kaba donkam kyrkieh ban wanrah biang ïa ka Manipur ha ka lynti jong ka jingsuk bad jingïamap, la ong kitei ki seng.
“Ngi long kiba skhem ban ïakhun pyrshah ïa ka jingshah pyndonkam bakla ka Riti Synshar bad ïa ki hok jong ki sorkar jylla kiba la shah jied. Ka don ka jingpyrshang ban pyntlot ïa ki sorkar jylla,” la ong kitei ki seng.
Ki la kdew ba ka rukom treikam jong ki Lat ha ki jylla bym synshar da ka BJP ka la long shabar u pud u sam jong ki kyndon ha ka Riti Synshar. Ki la ong ruh ba ka jingpyndonkam bakla ïa ki kynhun tohkit da ka sorkar BJP pyrshah ïa ki seng bad ki nongïalam ki bym kyrshan ïa ka, ka la pyntlot ïa ka jingsynshar paidbah.
“Ki jylla bym synshar da ka BJP ki la shah pynduh lut ïa ki jingdonkam bad ki jingïoh bhah ba dei hok ha ka Sorkar Pdeng,” la ong kitei ki seng.
Shuh shuh ki la ong ba ki long kiba kloi ban ïakhun ïa ki jingeh ha ka liang ka ïoh ka kot naduh ka jingkiew dor ki mar ki mata bakongsan bad ka jingbym ïoh kam ïoh jam. Ki la pynkynmaw ruh ba ka jingpynduh ïa ki lut T. 500 bad T. 1000 lane ka ‘Demonetisation’ ka la ktah jur ïa ki karkhana MSME bad kiwei ki karkhana kaba la ïalam pat sha ka jingbym ïoh kam ïoh jam ki samla.
“Ngi pyrshah ïa ka jingdie noh ïa ki jingdon jingem jong ka Ri sha ki katto katne. Ngi donkam ban tei ïa ka ïoh ka kot ka bym shah liang na ka bynta baroh, bad ki nongrep ki dei ban ïoh ïa ka jingïarap bakyrpang,” ki la ong.
“Ngi la wan lang hajuh ban pynliem ïa ki kam isih para briew & jingïaumsnam pyrshah ïa ki rit paid; ban pynsangeh ïa ki jingshah thombor ki kynthei, Dalit, Adivasi, bad ki Kashmiri Pandit; ban dawa ba baroh ki dei ban ïoh lad ban pynsngew ïa kaei kaba ki don ban pynpaw, bad kum ka sienjam banyngkong, dei ban pyntreikam ïa ka Caste Census,” la ong kitei ki seng.
Nalorkata, ki la ong ba kin ïakhun pyrshah ïa ki buit sianti jong ka BJP ban lehbeiñ ïa ki para nongshong shnong.
“Ka jingïalap ban wanrah ïa ka jingisih para briew ka la ïalam sha ki kam ïaumsnam ïa kito kiba pyrshah ïa ka sorkar. Kine ki kam thombor kim dei tang ba ki long pyrshah ïa ka Riti Synshar, hynrei ki la ktah ïa ki nongrim ba la seng ïa ka Ri India. Ka jingïai pyrshang jong ka BJP ban pynkylla ïa ki jingthoh kiba ïadei bad ka mynnor ki long pyrshah ïa ka jingïalong kawei bad ka jingïasuk hapdeng ki kynhun bapher-bapher,” la bynrap kitei ki seng.
