Shillong, Naitung 18:
Ka President ka UDP Women Wing, Sengkmie, ka Kong Pretty Kharpyngrope ka la pynpaw ba ka jingrem u Bah Lambor Malngiang uba dei u kyrtong ka UDP na Nongkrem konstitwensi kam dei na ka daw u Bah Bindo M. Lanong uba ïakhun kum u kyrtong shimet na katei kajuh ka konsttiwensi ha kane ka ilekshon MLA ba dang shu dep.
Ka la ong ba ka jingrem u Bah Lambor ha kane ka ilekshon ka dei beit ha ka bor jong u hi namar u Bah Bindo u khlem ïoh bun ‘vote’.
Haba kylli balei ka UDP ka dang pynskhem ïa u Bah Bindo kum u MDC shu sieh ha KHADC haba u la ïakhun pyrshah ïa u Bah Lambor Malngiang, ka Kong Pretty ka la ong ba ka UDP kam nud ban weng jyndat ïa u Bah Bindo na katei ka shuki watla u la ïakhun pyrshah ïa u kyrtong ka UDP namar ha ka UDP ïa u Bah Bindo ka la shim kum u kpa namar u dei uba la kham rangbah.
“Ban shim ïa kano-kano ka rai pyrshah ïa u Bah Bindo ka long kaba eh ïa ngi ki nongïalam ka UDP namar u dei uba la rangbah, kumta kum ka jingburom ïa u haba u la don bad ka UDP ngin pynneh beit kum u MDC shu sieh” ka la ong.
Shuh shuh ka Kong Pretty ka la ong ba haduh mynta u Bah Bindo u dang dei hi u nongaibuit ba rangbah jong ka seng UDP bad un dang bteng ïa kane ka kam.
Kumban shu pynkynmaw ha kane ka ilekshon ha Nongkrem konstitwensi, u Bah Lambor Malngiang kum u kyrtong UDP bad MLA barim u la ïoh 9099 ‘vote’, katba u Bah Bindo Lanong kum u kyrtong shimet u ïoh 138 ‘vote’ nalor kiwei-kiwei.
