Shillong, Naitung 18:
Ka Meghalaya High Court ha ka Sngi Ba-Ar ka la pynpaw ba ka mat hapdeng ka sorkar Meghalaya bad ka Harijan Panchayat Committee (HPC), kaba dei ka kynhun kaba mihkhmat ïa kiba shong ba sah ha Them Ïew Mawlong, ka la shu slem shaba palat.
Ka jingpynpaw na ka High Court ka la ong ha ka sngi ba ka la shong bishar halor ki mukotduma. Ha kajuh ka por, ka la ong ba na ka daw ba ka sorkar bad ka HPC ki dang ïa pyrshang ban ïakren ban poi sha ka jingïabeit, ka ïingbishar kam kwah satia ban tuklar lane mushlia.
“Hynrei, ngi la dep ban ong la bunsien ba kane ka mat ka la shu slem shaba palat,” la ong ka High Court.
Ka jingbishar kan long biang hadien hynriew taïew bad ka High Court ka khmih lynti bad ka kyrmen ba haba kut jong kata ka hynriew taïew, kitei ki arliang mamla kin poi sha ka jingïabeit.
