New Delhi, Naitung 18 (UNI):
U Myntri Rangbahduh ka Ri, u Narendra Modi, ha ka Sngi Ba-Ar u la kob ba ka kynhun synrop National Democratic Alliance (NDA), ba la ïalam da ka BJP, kan ïoh palat 50% ka ‘vote’ lane ka ‘vote share’ ha ka ilekshon MP Lok Sabha ka ban long ha u snem 2024 namar ki seng saiñpyrthei kiba don ha kane ka kynhun ki trei shitom.
Ïa kane, u Modi u la kren ha ka jingïalang bad ki 38 tylli ki seng saiñpyrthei kiba don ha ka kynhun NDA ha New Delhi. U Myntri Rangbah ka Meghalaya, u Conrad K Sangma, u la leit ban ïashim bynta lang ha kane ka jingïalang namar ka National People’s Party (NPP) ka don hapoh ka shatri jong ka NDA.
Ka jingïakynduh jong ka NDA ka long ruh ha ka sngi ba 26 tylli ki seng kiba shong ha ka liang pyrshah ki la pynbna ïa ka jingthaw ïa ka kynhun synrop I.N.D.I.A lane “Indian National Developmental Inclusive Alliance” ha nongbah Bengaluru ban ïakhun pyrshah ïa ka NDA bad BJP ha ka ilekshon Lok Sabha ka ban long ha u snem ban wan.
Haba kynthoh najngai ïa katei ka kynhun synrop I.N.D.I.A, u Modu u la ong ba kano-kano ka kynhun ba la thaw la seng da ka jingmut jingpyrkhat ka bym bha bad ka bym shai, kan ym lah satia ban thaw pyrthei eiei ha kane ka Ri.
Haba khyrwit ïa ka seng Congress kaba la ju donkti mynshwa ban pynkhyllem ïa ki sorkar ha ki jylla, u Modi u la ong, “Ka Congress ka la pyndonkam ïa ki kynhun synrop ban pynkhyllem ïa ki sorkar ha ki snem 1990 shaneng. Ka Congress ka la thaw ïa ki sorkar bad ka la pynkhyllem ïa ki.”
“Ïa ka NDA ym shym la thaw ban ïakhun pyrshah ïa kano-kano ka seng, hynrei ban pynskhem ïa ka jingsynshar ha ka Ri,” la bynrap u Myntri Rangbahduh.
U la ong ruh, “Lada ka kynhun synrop ka ïalum tang ban ïoh bor lane ban leh ïa ki kam bamsap bamngem lane ban ailad ïa ki bahaïing hasem lajong, kaba kum kata ka kynhun synrop ka long kaba ktah jur ïa ka Ri.”
Ha kajuh ka por, u Modi u la ai kyrteng thymmai ïa ka NDA na ka National Democratic Alliance sha ka “New India, Developed Nation, Aspiration of People of India”. Ïa ka NDA la seng ha u snem 1998, u la ong.
“Lada ka Ri ka don ïa ka sorkar kaba skhem, kata ka Ri kan lah ban shim ïa ki rai kiba tyngeh bad kita ki rai ki pynkylla ïa ka jingïaid lynti jong ka Ri,” u la ong.
Haba pynkynmaw ïa ki 10 snem jong ka jingsynshar ka sorkar UPA, u Modi u la ong, “Ka nuksa jong ka sorkar synrop ka don hakhmat jong ngi hashwa u snem 2014. Ka la don da ka ‘High Command’ halor jong u Myntri Rangbahduh.”
Ha ka por ba ka NDA ka la don ha ka liang pyrshah, u Modi u la ong ba ka la pynpaw paidbah ïa ki kam bamsap bamngem jong ka sorkar, hynrei ka khlem leh lyndet na kaei kaba ki paidbah ki la ai rai.
“Ngi khlem shim jingïarap na ki bor kiba nabar ri ban ïakhun pyrshah ïa ki sorkar jong kane ka Ri. Ngi khlem pynthud satia ïa ka jingïaid beit ki skhim ha kane ka Ri,” la ong u Modi.
Haba kren halor ka jingdonkam jong kane ka kynhun synrop ha ka ilekshon, u Myntri Rangbahduh u la ong, “Ka jingïoh ‘vote’ jong ka NDA ka long 38% ha u snem 2014 bad kane ka la kiew sha ka 45% ha u snem 2019. Ha ka ilekshon Lok Sabha ha u snem 2024, ka jingïoh ‘vote’ jong ka NDA kan tam ïa ka 50% namar ki seng kiba don ha ka kynhun synrop ki trei shitom.”
“Ki paidbah nongshong shnong ki la dep rai lypa ba kin pynjop biang ïa ka sorkar NDA ha ka sien kaba lai,” u la kob.
