Shillong Naitung 18:
Ka mat halor ka lynti rel ka dei kaba la ïakren la bun phew snem, hynrei kumno ka ai jingmyntoi bad kumno shah ktah ha kiba nabar ka dei kaba ym pat don ka jingtih bniah.
Haba twad jingmut na ka Myntri Sorkar ka Kong Ampareen Lyngdoh, ka la ong ba ym dei maka marwei ban rai la ka rel ka dei ban wan sha Khasi Jaiñtia.
Hynrei kane ka Myntri kaba dei ka nongaiktien jong ka Sorkar, ka la pynpaw ba namarba ka rel ka la poi haduh Mendipathar ha Rilum Garo ha kane ka Jylla, ka long kaba donkam ruh ban tip bad pule kham bniah kumno ka Rilum Garo ka la myntoi bad kumno ka jingwan kiba nabar ka jia ne em hangthie bad don jingktah.
“Ngam lah ban kren palat nalor nangta, bad ngi ju don ki jingmut kiba ïapher na ka liang ki paidbah namar don kiba kyrshan bad pyrshah,” la ong ka Kong Ampareen.
Ka Kong Ampareen ka la ong ruh ba man la ki mat ha ka Jylla ki don beit ki jingmut ba ïapher bad ka la ai nuksa ruh halor ka jingmih bun sur haba thmu ban tei ïa ki projek bording, bad sngi sngewthuh kumno ka ktah namarba ki nongshong shnong ka Jylla ki mad jingeh bad hap pynlip bording ilektrik da ki bun kynta.
Ka Kong Ampareen ka la pyni nuksa ruh ïa ka nongbah Shimla ha Himachal Pradesh bad Darjeeling ha ka rel ka long ka jingmyntoi bad khring ïa ki briew nabar bad kyntiew ïa ki kam jngohkai.
Kane ka Myntri ka la bynrap ruh ba ka Rilum Garo kaba la don lypa ka lynti rel haduh Mendipathar, bad lada ka kloi ban pdiang lehse kan ïoh shuh ban nang pynjrong ïa ka lynti rel hapoh ka thaiñ.
