Nongstoiñ, Naitung 18:
U Deputy Commis-sioner jong ka West Khasi Hills District u la pyntip ba kum ka jingbud ryntih ïa ka hukum kaba la pynmih da ka ïingbishar High Court ka Jylla Meghalaya, ki bor pynïaid district bad ka tnat pulit ki la trei shitom bad shim ïa ki lad ki lynti kiba pyrkhing bha ban tehlakam ïa ka jingtreikam be-aiñ jong ki karkhana saiñ dewïong hapoh jong ka District.
Ha ka kyrwoh khubor ba la pyllait ha ka sngi Ba-ar, u DC u la ong ruh ba da ka jingtrei shitom jong ki Executive Magistrate bad ki bor pulit, ha ka 16 bad 17 tarik u Nohprah 2022 la pynlong ïa ka jingkhynra ïa ki karkhana saiñ dewïong be-aiñ bad la ïoh ban khangdam haduh 57 tylli.
U la ong ruh ba hapdeng u bnai Rymphang haduh Ïaïong 2023, la ïoh ban pynpra noh ïa ki jaka shet bad ki pipe kiba pynïasnoh bad ki atoskhana jong kitei ki karkhana saiñ dewïong be-aiñ bad ban pyntikna ba kim lah shuh ban dang treikam.
Shuh shuh ka kyrwoh khubor na u DC ka ong ruh ba kum shibynta ban pynthikna halor ka jingdonkti jong kito ki briew ban pyntreikam ïa kine ki karkhana saiñ dewïong be-aiñ, da kaba bud ryntih ïa ki kyndon jong ka aiñ, la rejistar case hapoh thanad Shallang lyngba ka PS Case No.39(12)2022U/S188/34/379/120BIPC R/w Sec 15 Environment (Protection) Act, Sec 3 Explosive Substances Act bad Sec 51(1) Benami Transaction (Prohibition) Act, 2016.
Halor kane, la ïoh sabut ïa ka jingdonkti jong bun ngut ki briew bad haduh mynta la ïohkem haduh 6 ngut na ki, kiba kynthup ïa u Youdishthra Bham na Assam, u Ashish Arya na Guwahati, Assam, u Khrawbok Rongrin na Shallang, u Hopeful Nongtdu na Rymbai Synrang, East Jaintia Hills, u Yaman Bansal, na Beltola, Guwahati, Assam bad u Eras Dkhar na Nongstoin, West Khasi Hills.
Shuh shuh u la ong ruh ba katba dang ap ïa ka kaiphod na ka committee kaba kheiñ ba diah halor u dewïong (Audit Committee on Source of Coal) kaba la thung da ka Sorkar Jylla, naduh ka 19 tarik u Jymmang haduh mynta, la dep ban khang haduh saw tylli ki karkhana kiba don ïa ki kot ki sla kiba biang (valid CTE, CTO) kiba kynthup ïa ka M/s Shemphang Riangshiang, Pyndeng Jalong, Doranggri, Shallang, M/s Rilyngngam coke Industries, KyllonMathei, Shallang, M/s M.D. Coke Industries bad M/s Carbochem India kiba don ha ka shnong Nongdakong, Shallang.
U DC u la ong ba hadien ba la ïoh jingmynjur na ka Sorkar Jylla hapoh ka jingïalam bad jingkhmih jong u Bah HK Thabah, MCS, Addl. Deputy Commissioner, I/c Mawshynrut Civil Sub-Division la thaw ïa ka kawei ka kynhun kaba kynthup ïa ki Gazetted Police Officer, Meghalaya State Pollution Control Board, Commerce bad Industries na ka bynta ban pynpra bad pynbthei noh ïa ki Atoskhana jong ki 57 tylli ki karkhana saiñ dewïong be-aiñ kiba la shna khlem ka CTE kaba biang bad ïa kane la sdang naduh ka 8 tarik u Naitung 2023 bad kat haduh ka 15 tarik u Naitung 2023, haduh 13 tylli ki Atoskhana jong kitei ki karkhana saiñ dewïong be-aiñ kiba don ha Nonglangpar (Kyllonmathei) kiba don ha ki co-ordinate (i) 25.5220613, 90.9035105 (ii) 25.5224573, 90.8992605 (iii) 25.5201515, 90.9032912 (iv) 25.5185800, 90.9041877 (v) 25.5174384, 90.9062416 (vi) 25.5128946, 90.9028738 (vii) 25. 5138295, 90.9038863 (viii) 25.5146504, 90.9051718 (ix) 25.5146671, 90.9067402 (x) 25.5177594, 90.9006992 (xi) 25.5191951, 90.9023759 (xii) 25.5214483, 90.9009416 bad (xiii) 25.5212888, 90.8993075 la dep ban pynbthei bad ban pynpra noh ïa ki.
La ong ruh ba kane ka jingpynbthei bad jingpynpra ïa ki Atoskhana jong kitei ki karkhana saiñ dewïong be-aiñ kan dang bteng bad la buh thong ban pyndep hapoh 30 sngi kaba la sdang treikam naduh ka 7 tarik u Naitung, 2023.
U DC u la ong ruh ba na ka bynta ka bha ka miat bad ka suk ka saiñ jong u paidbah, la pynjari ïa ka hukum hapoh ka kyndon 144 CrPC kaba la pynmih ha ka 11.07.2023 ban khang pyrshah ïa ka ïaid ka ïeng jong ki paidbah ne kino kino ki kynhun ha ka radius kaba 1 km na ka jaka ba don kitei ki karkhana saiñ dewïong be-aiñ bad la bthah ruh ïa ki paidbah ba kin ïatreilang bad ki bor pynïaid District katba kane ka kam ka dang ïaid, bynrap ka kyrwoh u Deputy Commissioner.
