Tura, Naitung 18:
Ka jingïakhih shah thngan jong ka Achik Conscious Holistically Integrated Krima (ACHIK) ha Tura ka la poi sha ka sngi kaba 8 ha ka Sngi Ba-ar bad ki nongïakhih ki la pyneh triang ban ym pyndem kat bym ïoh ïa ki jingkular na u Myntri Rangbah ka Jylla, u Conrad K. Sangma ne ki dkhot ka Kynhun Myntri jong u halor ki mat jingdawa ba la pynsngew.
Ka ACHIK lem bad kiwei-kiwei ki kynhun seng ki la dawa ban pyntreikam na shadien ïa ka ‘Roster System’ nalor ban pynlong ïa ka Tura kum ka nongbah ka Jylla ha ka por tlang.
“Haba peit ïa ka rukom leh ka Sorkar haba ïadei bad ki jingïakhih jong ngi, ngim da khmih lynti eh ba yn shim ïa kano-kano ka sienjam ban ïakren noh shen bad ngi. Ngi long kiba la khreh ban bteng ïa ka jingïakhih jong ngi bad ngi lah ruh ban bteng da ki bnai lada ym don kano-kano ka jubab,” ong u nongaibuit, u Laben Ch Marak.
Kumban shu kdew hangne, u Deputy Commissioner ka WGH, u Jagdish Chelani u la wan mih ha katei ka jaka ban kyrpad pynsangeh noh ïa ka jingïakhih.
U DC u la kyrpad ban pynkut noh ïa ka jingïakhih, hynrei ki nongïakhih kim shym la khih bad kular ban bteng ïa ka jingïakhih katba kim pat ïoh ka jingkular na u Myntri Rangbah halor katei ka bynta.
“Kane kam dei shuh ka jingïakhih da ma ngi. Mynta ka la dei ka jingïakhih paidbah jong ki nongshong shnong ka Ri-lum Garo bad na bynta ka lawei ki khun ki kti jong ngi. Ngim lah ban pynkut noh ïa ka jingïakhih namar ki nongshong shnong ka Ri-lum Garo ki kyrshan bad phai khmat sha ngi ban bteng ïa ka jingïakhun na bynta ka mat kaba la sahteng la slem bah. Baroh ki phai khmat sha ngi bad ngim lah ban ieh noh ïa ki,” ong ka General Secretary ka ACHIK, ka Bernita Marak.
Halor ka jingong u DC ba ka jingïakhih ka ACHIK ka long kaba be-aiñ, ki nongïakhih ki la jubab da kaba buh jingkylli kumno ka jingïakhih ba jai-jai (kum kane kaba pynlong ma ki) ka long pyrshah ïa ka aiñ.
“Ka Riti Synshar ka Ri India ka shah na bynta ki jingïakhih ba jai-jai hapoh ka Article 19 a, b bad c. Ngi don hok ban pyni ba ngim mynjur bad ka Sorkar ne ban pynsngew ïa ki jingsngew jong ngi da kaba jai-jai. Naduh ka sngi ba ngi sdang, kam shym la don wat tang kawei ruh ka sien ka ban mih jingkulmar na ka liang ki kynhun jong ngi. Ha ka nongrim aïu ba u ñiew ïa ka jingïakhih jong ngi kum kaba be-aiñ,” buh jingkylli ka Bernita.
Ki la ong ruh ba kam don kano-kano ka jingleh politik haba ïadei bad katei ka sienjam ba ki la shim bad kaei kaba ki kwah ka long ka lawei kaba bha na bynta kiba hadien.
“Man la ki kam pynroi kiba ïadei bad kane ka jingdawa nongbah ha ka por tlang ïa ka Tura ka dei kaei kaba ka Ri-lum Garo kan ïoh. Mynta, na bynta jong ngi ban leit sha Shillong ka long kaba rem ïa baroh. Lyngba ka nongbah ha ka por tlang, ïa kane yn lah ban pynduna,” bynrap u Laben.
Ka ACHIK ka la ong ba kam pyrshah ïa kano-kano ka jaidbynriew bad kam don jingthmu ban dawa sloit kam ïa kito kiba la don lypa ha ka kam.
Na ka liang u President ka AAYF, u Salsam Marak u la kypad ïa kiwei-kiwei ki kynhun seng jong ka thaiñ ban wan shakhmat bad kyrshan ha ryngkat ka jingkyntu ïa u Myntri Rangbah ka Jylla, u Conrad Sangma ban wan ïakren bad ki nongïakhih.
