Mawkyrwat, Naitung 18:
Ki runar bym lah ban tip ne ithuh ha kine ki khyndiat sngi ki la leit ban prong tuh ïa ka shlem treikam jong ka Khasi Hills Autonomous District Council (KHADC) Mawkyrwat Branch, South West Khasi Hills District.
Katkum ki tyllong khubor ba la ïoh lum la ïathuh ba kane ka jingjia shah prong tuh ha ki runar ka lah ban dei ha ka sngi Saitjaiñ ne sngi U Blei ha ka por ba kane ka shlem treikam ka khang bad la antad ruh ba ka lah ban dei ha ki por mynmiet.
Halor kane ka jingjia, la ïathuh ba katkum ki dak ki shin ba paw ki dien kjat, ki runar ki la kiew na ki bynta ba shadien jong ka mala ba najrong da kaba ki la pynpait ïa u huk jingkhang bad rung shapoh ki kamra.
“Ki runar ki la pynjot ruh ïa ki tala jong ka kamra u Superintendent of Professional Tax In-charge Mawkyrwat Branch Office, bad ka kamra ba shong ka Magistrate First Class, Subordinate District Council Court Khasi Hills, Mawkyrwat bad phriang ruh ïa ki kot ki sla sha madan.
Shuh shuh la ïathuh ruh ba halor kane ka jingjia la dep pyntip ha ki bor pulit bad ïa ka jingjah jong ki kot ki sla ne ki tiar ki tar kat haduh mynta ym lah ban tip.
