Tura, Naitung 18:
Ka jingkren jong ka Myntri ka tnad ka koit ka khiah ka Jylla, Dr. M. Ampareen Lyngdoh halor ka jingdawa ka ACHIK ïa ka Tura kum ka nongbah ha ka por tlang ka la pynbitar shi kat dei ïa ki nongïakhih bad u paidbah ba bun balang ha Tura, kiba la ñiew ïa katei kum ka jingñiew beiñ ïa ka jingïohi jngai ki nongïalam ba pynïoh Jylla na bynta ka ‘Winter Capital’.
Haba jubab halor ka jingkren ka Myntri, ka ACHIK ha ka Sngi Ba-ar ka la ong ba ka long kaba kyndit ba ka ‘riew saiñ pyrthei kaba la ih ha ka kam bad ka Myntri, ka la kyntait ïa jingdawa kaba la slem ban pynlong ïa ka Tura kum ka nongbah ha ka por tlang jong ka Jylla.
Katei ka jingkyntait ka la wanrah ïa ka jingbym sngewhun bad ki nongshong shnong ki la buh jingkylli halor ka jingshimkhia ka Sorkar haba ïadei bad ka roi ka par ha ka thaiñ ka bym shah liang, ong ka seng.
Ka Dr. Lyngdoh ka la kren ïa katei ha ka jingïalang paidbah ha kaba ka la kyntait ïa ka jingdawa ban pynlong ïa ka Tura kum ka nongbah ha ka por tlang, ka jingtyrwa kaba la long ka sobjek jong ka jingangnud na bynta katei ka jaka da ki phew snem mynta. Katkum ka jingong ka ACHIK, ka jingkren jong ka Myntri, ka la khring ïa ki jingkynthoh halor ka jingbym pynleit jingmut ïa ka roi ka par hapoh ka thaiñ.
Ka seng ka la bynrap ba ka jingmut ban don ïa ka nongbah ha ka por tlang kam long kaba pher ha ki thaiñ ha kaba ki jingtasam ka jinglong-jingman suiñ bneng ki lah ban ktah ïa ka synshar-khaddar bad ki kam ba man ka sngi. Ha kiba kum kitei ki thaiñ, lah ban don ka lad na bynta sa kawei ka jaka pdeng kum ka bor pynïaid ban pynduna ïa ki jingtynjuh jong ka tlang, ong ka seng.
“Ka jingkyntait ïa ka jingdawa ban pynlong ïa ka Tura kum ka nongbah ha ka por tlang lah ban ïohi kum ka jingñiew beiñ ïa ka jingïohi jngai ki nongïalam ba pynïoh Jylla na bynta ka ‘Winter Capital’ halor ki daw bapher-bapher. Kam dei ka jingdawa kaba mynnin. Ki nongïalam ba pynïoh Jylla haba pyrkhat ban pynïeng ïa ki nongbah na bynta ki bor pynïaid, ki la thmu ban pyntikna ïa ka roi ka par ka bym shah liang bad ka jingkynthuplang ha ki thaiñ bapher-bapher,” ka la ong.
Ka ACHIK ka la kdew ba ka Tura, kaba don ha ka phang sepngi jong ka Jylla ka la ju shah peit naduh ki por mynshuwa kum ka thaiñ kaba sahdien haba nujor bad ka nongbah ka Jylla, bad ka jingsngew ban pynlong ïa ka kum ka nongbah ha ka por tlang la ïohi ba kan sa don ka jingkiew ha ka ïoh ka kot.
Haba pynsngew ba ka mat halor ka ‘Winter Capital’ kam dei shuh ka bathymmai ha India, ka seng ka la pynkynmaw ïa ki Jylla bapher-bapher kiba la bud ïa ka rukom ban kynriah ïa ki Headquarter sha kawei pat ka nongbah ha ka por tlang.
Shuh shuh katei ka la pynlong ïa ki nongïalam ka thaiñ ha Tura ban pynrem jur ïa ka jingkren ka Myntri.
